غزہ (روز نامہ قدس ۔آن لائن خبر رساں ادارہ) حماس کے سیاسی شعبے کے سربراہ اسماعیل ھنیہ کا روس سمیت دوسرے ملکوں کا دورہ ملتوی ہوگیا ہے۔
روز نامہ قدس کو موصول ہونے والی اطلاعات کے مطابق حماس کے سیاسی شعبے کے سینیر رکن ڈاکٹر موسیٰ ابو مرزوق نے بتایا کہ روسی وزارت خارجہ نے پیغام دیا ہے کہ اسماعیل ھنیہ ماسکو کے دورے میں کچھ وقت کی تاخیر کریں اور کچھ وقفے کےبعد وہ اپنا دورہ مکمل کریں۔
ابو مرزوق نے ’’ٹوئٹر‘‘ پر پوسٹ ایک بیان میں کہا کہ انہوں نے روس کے مشرق وسطیٰ کے لیے امن مندوب میخائل بوگدانوف اور روس کے نائب وزیر خارجہ کے ساتھ ٹیلیفون پر بات چیت ہوئی ہے۔ دونوں رہنمائوں کے درمیان فلسطین کی تازہ ترین صورت حال پر تبادلہ خیال کیاگیا۔
حماس رہنما نے کہا کہ روسی حکام نے انہیں یقین دلایا کہ فلسطین کے حوالے سے ماسکو اپنے دیرینہ اور اصولی مؤقف پر قائم ہے۔
ابو مرزوق کا کہنا تھا کہ حماس کے سیاسی شعبے کے سربراہ کا دورہ روس جلد ہوگا۔حماس اور روس دونوں اس دورے کو جلد مکمل کرنا چاہتےہیں۔