فلسطین کے علاقے غزہ کی پٹی میں ایک فوجی پریڈ کے دوران بیت لاھیا کے مقام پر حادثے کے نتیجے میں اسلامی تحریک مزاحمت "حماس” کے عسکری ونگ القسام بریگیڈ کا ایک کمانڈر جام شہادت نوش کرگیا۔ شہید فلسطینی مزاحمت کار کی شناخت مومن نبیل البحری کے نام سے کی گئی ہے جس کی عمر 27 سال بیان کی جاتی ہے۔
مرکزاطلاعات فلسطین کے مطابق حماس کے عسکری ونگ القسام بریگیڈ کی جانب سے جاری ایک بیان میں صرف اتنا بتایا گیا ہے کہ تنظیم کا ایک دیرینہ کارکن فوجی پریڈ کے دوران حادثے کے نتیجے میں شہید ہوگیا ہے۔ تنظیم کو اپنے کارکن کی شہادت پر گہرا دکھ ہے۔ حماس کی جانب سے بھی نبیل البحری کی شہادت پر افسوس کا اظہارکرتے ہوئے اس کے اہل خانہ سے گہری ہمدردی کا اظہار کیا ہے۔
خیال رہے کہ غزہ کی پٹی میں حماس اور دوسرے مزاحمتی گروپوں کے ہاں تربیتی نوعیت کی ورکشاپس جاری رہتی ہیں۔ اس سے قبل بھی غزہ کی پٹی میں عسکری تربیت کے دوران حادثات کے نتیجے میں مجاھدین شہید اور زخمی ہوتے رہے ہیں۔