رام اللہ (روز نامہ قدس ۔آن لائن خبر رساں ادارہ) اسلامی تحریک مزاحمت (حماس) نے باور کرایا ہے کہ فلسطین کے مقبوضہ مغربی کنارے میں فلسطینیوں کے گھروں کی مسماری فلسطینیوں کو صیہونی دشمن کے خلاف مزاحمت سے باز نہیں کرسکتی۔
روز نامہ قدس کو موصول ہونے والی اطلاعات کے مطابق حماس کی طرف سے جاری ایک بیان میں کہا گیا ہے کہ اسرائیلی فوج کی طرف سے فلسطینی شہریوں کے مکانات کی مسماری صیہونیوں کی مجرمانہ ذہنیت کی عکاس ہے۔ فلسطینی شہری اپنی جانوں پر کھیل کر آزادی کی جدو جہد کو زندہ رکھے ہوئے ہیں۔ فلسطینیوں کو بے دردی کے ساتھ شہید کرنا، شہداء کے جسد خاکی کو ان کے ورثاء کے حوالے نہ کرنا اور فلسطینیوں کے گھروں کو مسمار کرنا مقامی شہریوں کو دباؤ میں لانے کے مجرمانہ اور مکروہ حربے ہیں۔ بہادر فلسطینی قوم اس طرح کے حربوں اور انتقامی کارروائیوں سے خوف زدہ ہو کر مزاحمت ترک نہیں کریں گے۔
خیال رہے کہ گذشتہ روز قابض اسرائیلی فوج نے فلسطینی مزاحمتی رہنما الشیخ عمر البرغوثی کے مکان کو بلڈوزر کی مدد سے مسمار کر دیا۔ حماس نے البرغوثی خاندان کی بہادری، جانثاری اور ان کی 30سال سے اسرائیلی دشمن کے خلاف مزاحمت کو خراج تحسین پیش کیا۔
بیان میں مزید کہا گیا ہے کہ اسرائیلی دشمن فلسطینی مزاحمت کاروں کے گھروں کی مسماری کے ذریعے فرضی اور خیالی کامیابیوں کے دعوے کر رہا ہے مگر وہ فلسطینی قوم کو اس کے حق خود ارادیت سے اس طرح کے حربوں سے محروم نہیں کر سکتا۔