صیدا (روز نامہ قدس ۔آن لائن خبر رساں ادارہ) لبنان کے شہر صیدا میں اسلامی تحریک مزاحمت (حماس) کے 31 سالانہ تاسیسی اجتماع میں ہزاروں افراد نے شرکت کی۔ جماعت کے تاسیسی اجتماع میں حماس کی مقامی قیادت اور لبنان کی اہم سیاسی اور سماجی شخصیات نے بھی شرکت کی۔
روز نامہ قدس کو موصول ہونے والی اطلاعات کے مطابق لبنان کے صیدا شہر میں منعقدہ حماس کے تاسیسی اجتماع میں ملک کے مختلف شہروں سے وفود نے شرکت کی۔ جماعت کے تاسیسی اجتماع میں شرکت کرنے والوں میں حماس کے ارکان، لبنان میں مقیم فلسطینی پناہ گزین اور لبنان کے عام شہریوں نے بھی شرکت کی۔ حماس کے تاسیسی اجتماع کے لیے’’ہم ثابت قدم ہیں اور ہماری نگاہیں وطن پر مرکوزہیں ‘‘ کا عنوان دیا گیا۔ لبنان میں حماس کی قیادت نے آزادی کے لیے مسلح جدو جہد کے عزم کا اعادہ کیا۔
حماس کے تاسیسی اجتماع کا آغاز تلاوت کلام پاک سے ہوا۔ اس کے بعد حماس کے بیرون ملک شعبے کے سربراہ ماہر صلاح، نائب صدر محمد نزال، شعبہ اطلاعات کے انچارج رافت مرہ، اسامہ حمدان اوردیگر رہنماؤں نے خطاب کیا۔ مقررین نے اپنے خطاب میں فلسطین کی اسرائیلی ریاست کے غاصبانہ تسلط سے مکمل آزادی تک جدو جہد جاری رکھنے کے عزم کا اعادہ کیا۔
اس موقع پر لبنان اور فلسطین کے قومی ترانے بھی بجائے گئے۔ اجتماع گاہ میں ہرطرف حماس کے سبز پرچموں کی بہار تھی۔
حماس کی قیادت نے اپنی تقاریر میں جماعت کے مشن کو پایہ تکمیل تک پہنچانے کے عزم کا اعادہ کیا۔