مرکز اطلاعات فلسطین کے مطابق حماس کے ساتھ سیاسی معاہدے کے مطالبے پر غزہ کے بالمقابل یہودی کالونیوں ’’اشکول‘‘ کی علاقائی کونسل کے سربراہ حاییم یالین پیش پیش پیں۔ ان کا کہنا ہے کہ حماس کے ساتھ اسرائیل کو مستقل جنگ بندی کی ضرورت ہے۔ حالیہ جنگ بندی معاہدے کو مستقل کرنے کے لیے تل ابیب حماس کے ساتھ کوئی سیاسی معاہدہ کرے۔
صہیونی سیاست دان نے یہ بات غزہ کی پٹی پر اسرائیلی فوج کے فضائی حملے کے کچھ دیر بعد کہی۔ انہوں نے کہا کہ غزہ کی پٹی سے راکٹ حملوں کی روک تھام کا مسئلہ صرف طاقت کے استعمال سے حل نہیں ہوسکتا۔ اسرائیل کو فوجی کارروائی کے بجائے حماس کے ساتھ ایک مضبوط سیاسی معاہدہ کرنا چاہیے تاکہ غزہ کے جنگجووں کو راکٹ حملوں کی روک تھام پر مجبور کیا جاسکے۔
صہیونی سیاسی رہ نما یالین نے خبردار کیا کہ غزہ کی پٹی میں کشیدگی جنوبی اسرائیل میں بد امنی کی ایک نئی لہر پیدا کرسکتی ہے۔ اسرائیلی حکومت غزہ کی پٹی میں کی گئی جنگ بندی پر قائم رہے۔
خیال رہے کہ جمعہ اور ہفتہ کی درمیانی رات اسرائیل کے جنگی طیاروں نے غزہ کی پٹی پر متعدد مقامات پر بمباری کی تھی۔ اس واقعے کے بعد غزہ کی پٹی میں سخت کشیدگی پائی جا رہی ہے۔