اسلامی تحریک مزاحمت ’’حماس‘‘ کے عسکری بازو عزالدین القسام شہید بریگیڈ نے صہیونی دشمن فوج کو خبردار کیا ہے کہ وہ غزہ کی پٹی پرحملوں کی حماقت نہ کرے۔
القسام کا کہنا ہے کہ تنظیم کے جانثار اپنی جانوں پر کھیل کر فرزندان قوم کا دفاع یقینی بنائیں گے اور دشمن کی ہر جارحیت کا فوری اورمنہ توڑ جواب دیا جائے گا۔
مرکزاطلاعات فلسطین کے مطابق القسام بریگیڈ کے ترجمان ابو عبیدہ نے اپنے ایک بیان میں اسرائیلی فوج کے غزہ کی پٹی پر تازہ حملوں کو جنگی جنون قراردیا۔ انہوں نے کہا کہ فلسطینی مزاحمت کار دشمن کے حملوں کا فوری اور منہ توڑ جواب دینے کے لیے تیار ہیں۔ انہوں نے کہا کہ ہم دشمن کو واشگاف الفاظ میں یہ پیغام پہنچا رہے ہیں کہ وہ غزہ کی پٹی پرحملوں کا سلسلہ بند کردے ورنہ فلسطینی بھی اپنے دفاع میں اسلحہ اٹھانے پرمجبور ہوئے تو دشمن کو ناکوں چنے چبوائیں گے۔
القسام بریگیڈ کے ترجمان نے تصدیق کی کہ غزہ کی پٹی میں اسرائیلی فوج کے حملوں کے رد عمل میں حماس اور اسلامی جہاد کے مجاہدین کے درمیان مکمل اشتراک اور تعاون موجود ہے۔ انہوں نے کہا کہ ہم نے اسرائیلی فوج پر کئی مشترکہ حملے کیے ہیں اور آئندہ بھی مل کردشمن پرحملے کرتے رہیں گے۔
بشکریہ: مرکز اطلاعات فلسطین