اسلامی تحریک مزاحمت ’’حماس‘‘ نے تنظیم کے سیاسی شعبے کے سربراہ خالد مشعل اورامیر قطرکے پیش آئند ایام میں دورہ غزہ کی خبروں کی سختی سے تردید کی ہے۔
حماس کے پارلیمانی لیڈر ڈاکٹر صلاح الدین بردویل کا کہنا ہے کہ خالد مشعل اور امیر قطرالشیخ حمد بن جاسم آل ثانی کے دورہ غزہ سے متعلق پریس میں شائع ہونے والی خبریں محض افواہیں ہیں، جن میں کوئی صداقت نہیں ہے۔ انہوں نے کہا کہ وزیراعظم اسماعیل ھنیہ کی گفتگو کا غلط مفہوم اخذ کیا گیا ہے۔ خالد مشعل یا امیر قطر کے دورہ غزہ کا فی الحال کوئی پروگرام نہیں ہے۔
عرب خبر رساں ایجنسی قدس پریس سے بات کرتے ہوئے حماس کے لیڈر ڈاکٹر بردویل کا کہنا تھا کہ خالد مشعل فلسطین کے شہری ہیں۔ وہ جب چاہیں غزہ کی پٹی کا دورہ کرسکتے ہیں لیکن فی الحال ان کا ایسا کوئی ارادہ نہیں ہے۔ اگر وہ غزہ کی پٹی کا دورہ کرنا بھی چاہئیں تو اسے اچھالنے کی کوئی ضرورت نہیں ہو گی۔
انہوں نے کہا کہ بعض عرب ذرائع ابلاغ میں شائع ہونے والی یہ خبربھی بے بنیاد ہے کہ خالد مشعل ایک اعلیٰ سطحی عرب وفد کے ہمراہ جلد غزہ کا دورہ کرنے والے ہیں۔ اس طرح کی باتیں محض افواہیں ہوتی ہیں جن میں کوئی صداقت نہیں ہوتی۔ اگر خالد مشعل نے غزہ کے دورے کا فیصلہ کیا تو اس کا باضابطہ طور حماس کے سیاسی شعبے کی جانب سے اعلان کیا جائے گا۔
خیال رہے کہ حال ہی میں اسرائیلی اور بعض عرب اخبارات میں یہ خبرشائع ہوئی تھی کہ حماس کےسیاسی شعبے کے سربراہ خالد مشعل امیر قطر شیخ حمد بن جاسم اور ایک اعلیٰ سطحی عرب وفد کے ہمراہ غزہ کی پٹی کا دورہ کرنے والے ہیں۔
بشکریہ: مرکز اطلاعات فلسطین