حماس کی غزہ میں صہیونی جرائم کے خلاف آج عالمی ہڑتال کی اپیل

(روزنامہ قدس ـ آنلائن خبر رساں ادارہ) اسلامی تحریک مزاحمت حماس نے عرب اور مسلم ممالک کے عوام سمیت دنیا بھر کے حریت پسندوں پر زور دیا ہے کہ وہ غزہ کی حمایت میں آج جمعرات 2025 کو ہونے والی عالمی ہڑتال میں بھرپور شرکت کریں۔ حماس نے اپیل کی ہے کہ قابض اسرائیل کے خلاف عالمی عوامی تحریک کو جاری رکھا جائے۔

حماس نے اپنے بیان میں اس بات پر زور دیا کہ جمعہ، ہفتہ اور اتوار (بائیس، تئیس، اور چوبیس اگست 2025) کو ہر شہر، چوک اور دارالحکومت میں پرجوش ریلیاں اور شدید احتجاجی مظاہرے کیے جائیں۔ ان مظاہروں کا مقصد قابض اسرائیل کے جارحانہ حملے، فلسطینیوں کے اجتماعی قتلِ عام اور غزہ میں دو لاکھ سے زائد شہریوں پر مسلط کردہ قحط اور جبری بھوک کے خلاف آواز بلند کرنا ہے۔

تحریک نے تمام مظاہروں اور دھرنوں کا دائرہ کار امریکی اور صہیونی سفارت خانوں اور قابض اسرائیل کی حمایت کرنے والے ممالک کے سفارتی مشنز تک بڑھانے کی اپیل کی تاکہ غزہ پر جاری بربریت کو روکا جا سکے اور محاصرے اور قحط کا خاتمہ ممکن ہو سکے۔

حماس نے قابض اسرائیلی فوج کی جانب سے غزہ شہر پر قبضہ کرنے کے منصوبوں سے خبردار کرتے ہوئے کہا کہ اس کے نتیجے میں ایک لاکھ سے زائد افراد کو جبری نقل مکانی کا سامنا کرنا پڑ سکتا ہے۔ تحریک نے اسے فلسطینیوں کے خلاف جاری نسل کشی کی جنگ کا ایک نیا باب قرار دیا۔

حماس نے عالمی برادری کو قابض اسرائیل کے جرائم پر خاموشی اختیار کرنے کے نتائج سے خبردار کیا اور فوری کارروائی کا مطالبہ کیا تاکہ معصوم و نہتے فلسطینیوں کی نسل کشی کو روکا جا سکے، محاصرہ ختم کیا جائے اور غزہ پر جاری جارحیت کا خاتمہ ممکن ہو سکے۔