رام اللہ (روز نامہ قدس ۔آن لائن خبر رساں ادارہ) حماس کے مرکزی رہنما اور غرب اردن سے فلسطینی پارلیمنٹ کے منتخب رکن نایف الرجوب نے فلسطینی اتھارٹی کے غیر جمہوری اور آمرانہ طرز عمل پر شدید نکتہ چینی کی ہے۔
روز نامہ قدس کو موصول ہونے والی اطلاعات کے مطابق فلسطینی رکن پارلیمنٹ نے کہا کہ غرب اردن میں تحریک فتح اور فلسطینی اتھارٹی طلباء یونین کے انتخابات میں مداخلت کی مرتکب ہو رہی ہیں۔ فلسطینی اتھارٹی کےماتحت سیکیورٹی اداروں کی جانب سے جامعات میں طلباء کے جمہوری اور آئینی حقوق میں مداخلت کی جاتی ہے۔
ان کا کہنا ہے کہ غرب اردن میں فلسطینی اتھارٹی کے جمہوریت دشمن طرزعمل کے باعث گھٹن کی فضا پائی جاتی اور طلباء تنظیموں کے انتخابات طلباء کو آزادانہ حق رائے دہی کے استعمال کی اجازت نہیں جس کے باعث فلسطینی طلباء کی نمائندہ تنظیم اسلامک بلاک نے ’’پولی ٹیکنیک انسٹیٹیوٹ‘‘ میں ہونے والے یونین کے انتخابات کا بہ طور احتجاج بائیکاٹ کیا ہے۔
نایف الرجوب کا کہنا تھا کہ اسلامک بلاک نے ہمیشہ طلباء کے حقوق کی حمایت اور یونین کے انتخابات میں کامیابی حاصل کر کے طلباء کے حقوق کے لیے کام کیا مگر فلسطینی اتھارٹی اپنا سیاسی اثرو رسوخ استعمال کر کے اسلامک بلاک اور طلباء تنظیموں کی جمہوری اور آئینی سرگرمیوں پر پابندیاں عائد کر رہی ہے۔
خیال رہے کہ اسلامک بلاک کو اسلامی تحریک مزاحمت (حماس) کا ہم خیال طلباء گروپ سمجھا جاتا ہے۔ اس تنظیم کو فلسطینی اتھارٹی کی طرف سے غیر قانونی اور غیرآئینی دباؤ کا سامنا ہے اور مختلف تعلیمی اداروں میں اس تنظیم کی سرگرمیوں کو طرح طرح کے ہتھکنڈوں سے روکنے کی کوشش کی جاتی ہے۔