(روزنامہ قدس ـ آنلائن خبر رساں ادارہ) حماس اور غاصب صہیونی حکومت کے درمیان غزہ میں جنگ بندی پر اتفاق ہوگیا ہے جس کے بعد مقاومتی تنظیم نے ایران سمیت لبنان، یمن اور عراق کا شکریہ ادا کیا ہے جنہوں نے صہیونی حکومت کے خلاف مقاومت کا ساتھ دیا۔
حماس کے اعلی مذاکراتی رہنما خلیل الحیہ نے کہا ہے کہ غزہ کی عوام نے صہیونی جارحیت کے خلاف بے مثال مزاحمت کی اور ہم نے جنگ کے خاتمے کے لیے اپنی تمام تر کوششیں بروئے کار لائیں۔انہوں نے طوفان الاقصی کے دو سال مکمل ہونے کی مناسبت سے مقاومت کی قیادت اور شہداء کو خراج عقیدت پیش کیا۔الحیہ نے کہا کہ جنگ بندی اور مستقل امن کے آغاز پر اتفاق ہوچکا ہے۔
معاہدے میں انسانی امداد کی فراہمی رفح کراسنگ کا دوبارہ کھلنا اور قیدیوں کا تبادلہ شامل ہے۔ علاوہ ازیں صہیونی جیلوں میں بند ڈھائی سو عمر قید کی سزا پانے والے قیدیوں سمیت سترہ سو فلسطینی اسیر رہا کیے جائیں گے۔
انہوں نے مزید بتایا کہ امریکہ اور ثالثی کرنے والے ممالک کی جانب سے جنگ کے مکمل خاتمے کی ضمانت دی گئی ہے۔
