(روز نامہ قدس ۔آنلائن خبر رساں ادارہ )قابض صہیونی افواج کے مظالم کے خلاف برسرپیکار فلسطینی اسلامی مزاحمتی تنظیم حماس کے رہنما خلیل ال حیا نے اعلان کیا ہے کہ انکی تنظیم نام نہاد صدی کی ڈیل کے خلاف اپنا احتجاج جاری رکھے گی،اور اس کے لیے انکو تمام فلسطینی عوام اور گروپوں کی حمایت درکار ہوگی۔
تفصیلات کے مطابق حماس کے سیاسی شعبے کے رکن خلیل ال حیا کا کہنا ہے کہ انکی جماعت تمام فلسطینی عوام کے ساتھ مل کر انکی مدد سے فلسطین کاز کے خلاف کی جانے والی تمام سازشوں کا مقابلہ کرے گی۔
ان کا کہنا تھا کہ اسرائیل کو یہ بات اچھی طرح سے سمجھ لینی چاہیئے کہ فلسطین کے عوام میں اس قدر جوش،جذبہ اور اپنی سرزمین سے محبت ہے کہ وہ اس کے خلاف کی جانے والی تمام تر سازشوں کا توڑ کر سکیں۔وہ جمعہ کے روز غزہ میں منعقد ہونے والی ریلیوں کے شرکا سے خطاب کر رہے تھے۔
انہوں نے کہا کہ نام نہاد منامہ کانفرنس اپنے آغاز سے قبل ہی ناکامی کا شکار ہو چکی تھی اور اس کی واحد وجہ مسئلہ فلسطین کے اصل فریق یعنی فلسطینیوں کا بائیکاٹ تھا۔
انہوں نے ریلی کے شرکا پر زور دیا کہ وہ آپس میں اتحاد برقرار رکھیں،اپنی صفوں میں مخالفین کو جگہ نہ دیں،کیوں کہ دشمن کو ناکام بنانے کے لیے سب سے بڑا ہتھیار فلسطینیوں کا اتحاد سے ہے۔