اسلامی تحریک مزاحمت ‘‘حماس’’ کے شعبہ تعلقات عامہ کے نگران اسامہ حمدان کا کہنا ہے کہ بعض حلقے شام میں موجودہ فلسطینی پناہ گزینوں کو دمشق کے حالیہ بحران میں ملوث قرار دینے کی کوشش کر رہے ہیں لیکن ہم اس کوشش کو کامیاب نہیں ہونے دیں گے۔ ان کا کہنا ہے کہ تمام فلسطینی سیاسی جماعتوں میں اس بات پر مکمل اتفاق ہے کہ شام میں موجود فلسطینی موجودہ بحران میں مکمل طورپر غیر جانب دار رہیں گے۔ فلسطینی اس معاہدے پر کاربند ہیں اور شام کے بحران کو اس کا اندرونی مسئلہ سمجھتے ہیں۔
مرکز اطلاعات فلسطین کے مطابق حماس رہ نما نے دمشق میں فلسطینی پناہ گزین کیمپ پر مسلسل ہونے والی گولہ باری کی شدید مذمت کی اور اس میں شہید ہونے والوں کے لواحقین سے ہمدردی کا اظہار کیا۔ انہوں نے کہا کہ حماس اس طرح کے واقعات کی شدید مذمت کرتی ہے۔ ہمیں یہ معلوم نہیں کہ آیا مہاجر کیمپ کے فلسطینیوں کو کون قتل کررہا ہے تاہم جو بھی اس میں ملوث ہے وہ انسانیت دشمنی کا ثبوت دے رہا ہے۔
اسامہ حمدان کا کہنا ہے کہ شامی عوام اچھی طرح جانتے ہیں کہ فلسطینی ان کے ملک کے موجودہ داخلی بحران میں غیر جانب دار ہیں اور وہ کسی ایک فریق کی بھی حمایت نہیں کر رہے ہیں۔ ایسے میں فلسطینیوں پر کسی ایک فریق کے ساتھ تعاون کا الزام عائد کرنا نا انصافی اور حقائق سے منہ پھیرنے کے مترادف ہے۔