مرکزاطلاعات فلسطین کے مطابق حماس کی جانب سے جاری ایک بیان میں بتایا گیا ہے کہ جماعت کے سیاسی شعبے کے سربراہ خالد مشعل کی قیادت میں ایک اعلیٰ سطحی وفد نے ایرانی اسپیکر پارلیمنٹ ڈاکٹر علی لاریجانی سے ملاقات کی۔ ملاقات میں دو طرفہ تعلقات، باہمی دلچسپی کے امور ،علاقائی اور عالمی مسائل بالخصوص مسئلہ فلسطین کی تازہ ترین صورت حال پرتبادلہ خیال کیا گیا۔
بیان میں بتایاگیا ہے کہ حماس کی قیادت نے ایرانی اسپیکر پارلیمنٹ کو مسئلہ فلسطین کی تازہ ترین صورت حال بالخصوص غزہ کی ناکہ بندی اور اس کے منفی اثرات اور بیت المقدس اور مسجد اقصیٰ کو صہیونیوں کے ہاتھوں لاحق خطرات کے بارے میں تفصیل سے آگاہ کیا۔
خیال رہے کہ حماس اور ایران کے درمیان دو سال قبل کشیدگی اس وقت پیدا ہوئی تھی جب شام میں جاری خانہ جنگی کے نتیجے حماس کی قیادت نے دمشق چھوڑ دیا تھا۔ اس پر ایران نے ناراضی کا اظہار کیا تاہم حماس کی جانب سے کہا گیا تھا کہ وہ شام کے بحران کے معاملے میں کسی ایک فریق کے ساتھ کھڑی ہونے کے بجائے معاملے کوافہام وتفہیم سے حل کرنے کی خواہاں ہے۔
پچھلے چند مہینوں کے دوران یہ خبریں بھی آتی رہی ہیں کہ حماس کے سیاسی شعبے کے سربراہ خالد مشعل جلد ایران کا دورہ بھی کریں گے۔
بشکریہ:مرکزاطلاعات فلسطین