مرکزاطلاعات فلسطین کے مطابق غزہ کی پٹی میں ایک تقریب سے ٹیلیفونک خطاب کرتے ہوئے خالد مشعل نے فلسطینی شہداء کو زبردست خراج عقیدت پیش کیا۔ انہوں نے کہا کہ حماس اہالیان غزہ کو مشکل میں کبھی تنہا نہیں چھوڑے گی بلکہ وہ دن رات کام جاری رکھے ہوئے ہے تاکہ غزہ کے مفلوک الحال عوام کو ریلیف فراہم کیا جاسکے۔
خیال رہے کہ رفح میں احمد الغول نامی ایک نوجوان کی شادی کی تقریب سے خالد مشعل نے خطاب کیا۔ احمد کا پورا خاندان پچھلے سال اسرائیلی فوج کی غزہ پر وحشیانہ جارحیت کے نتیجے میں جام شہادت نوش کرگیا تھا۔
خالد مشعل نے کہا کہ ان کی جماعت قومی اصولوں اور دیرینہ مطالبات سے پیچھے نہیں ہٹے گی۔ وطن کی آزادی کے لیے مسلح مزاحمت حماس کا ’’ماٹو‘‘ ہے۔ جب تک فلسطین آزاد نہیں ہوتا مسلح جدو جہد ترک نہیں کریں گے۔
خالد مشعل نے غزہ کے عوام کی مشکلات کا احساس کرتے ہوئے اہالیان غزہ کی قربانیوں کا بھی تذکرہ کیا۔ انہوں نے حماس کی مقامی قیادت کی جانب سے اپنے پورے خاندان کو کھوہ دینے والے نوجوان احمد الغول کی شادی کی تقریب کا اہتمام کرنے پر قیادت کا شکریہ ادا کیا۔
بشکریہ:مرکزاطلاعات فلسطین