(روز نامہ قدس ۔آنلائن خبر رساں ادارہ) مقبوضہ فلسطین میں اسرائیلی بربریت کے خلاف برسرپیکار مزاحمتی تحریک حماس نے اسرائیلی خبروں پر تبصرہ کرتے ہوئے کہا ہے کہ فلسطینی اپنی سرزمین سے کسی صورت دستبردار ہونے کو تیار نہیں ہیں۔
حماس کے ترجمان حازم قاسم نے اپنے بیان میں کہا ہے کہ فلسطینیوں کو ان کی سرزمین سے بے دخل کرنے کا صیہونیوں کا ایک پرانا خواب ہے جس کے لئے اسرائیل نے نہتے فلسطینیوں کو بے گھر کرنے کیلئے انکا بے رحمی سے قتل عام کیا، انھوں نے کہا کہ فلسطینی عوام نے متعدد تاریخی مقامات پر یہ ثابت کیا ہے کہ وہ اپنی سرزمین سے بے انتہا محبت کرتے ہیں اور اس کے تحفظ کے لئے اپنی ہر چیزکو قربان کرنے کو تیار ہیں۔
ترجمان کا مزید کہنا تھا کہ فلسطینیوں نے اپنی سرزمین کے تحفظ کیلئے بے انتہا قربانیاں دی ہیں جس میں شہداء، اسیروں، جلاوطنوں اور زخمیوں کی ایک طویل فہرست ہے لیکن ان تمام مظالم کے باوجود فلسطینی ہر طرح کی مزید قربانیاں دینے کو ہروقت تیارہیں لیکن کسی بھی صورت اپنی سرزمین سے دستبردار ہونے کا سوال ہی پیدا نہیں ہوتا ہے۔
واضح رہے کہ اسرائیلی میڈیا میں خبریں گردش کررہی ہیں کہ اسرائیل غزہ کے فلسطینیوں کو فلسطین چھوڑنے پر آمادہ کررہا ہے اور جلد اس میں کامیابی حاصل ہوجائے گی ۔