(روزنامہ قدس ـ آنلائن خبر رساں ادارہ) القسام کا کہنا ہے کہ غاصب اسرائیل اپنے سفاکانہ فوجی دباؤ کے باوجود قیدی واپس نہ لے سکا اور فلسطینی مزاحمت کی پائداری کے بعد قیدی تبادلے کے ذریعے آزاد ہو رہے ہیں۔
فلسطینی مزاحمتی تحریک حماس کی عسکری شاخ القسام برگیڈ نے فلسطینی اور صہیونی قیدیوں کے تبادلے کے آغاز کے موقع پر بیان جاری کرتے ہوئے کہا ہے کہ یہ کامیابی فلسطینی عوام کی پائداری اور مزاحمتی جنگجوؤں کی استقامت کا نتیجہ ہے۔
بیان میں کہا گیا ہے کہ القسام مقررہ شیڈول کے مطابق عمل جاری رکھے گا جب تک کہ ناجائز ا اسرائیلی حکومت بھی اس پر عمل کرے۔ مزید کہا گیا ہے کہ قاتل ریاست اپنی فوجی اور انٹیلی جنس برتری کے باوجود قیدیوں کی واپسی میں ناکام رہی اور اب مزاحمت کے وعدے کے مطابق قیدیوں کا تبادلہ کر رہی ہے۔
القسام بریگیڈ نے آزاد ہونے والے فلسطین قیدیوں سے مخاطب ہو کر کہا کہ غزہ اور مزاحمت نے سب سے قیمتی اثاثہ قربان کیا اور آپ کی آزادی کے لیے بھرپور کوشش کی اور فلسطینی مسئلہ قومی ترجیحات میں سر فہرست رہے گا۔
