القسام بریگیڈز کی غزہ میں قابض فوج پر حملوں کی نئی لہر

(روزنامہ قدس ـ آنلائن خبر رساں ادارہ) اسلامی تحریک مزاحمت (حماس) کے عسکری ونگ عزالدین القسام شہید بریگیڈز نے اعلان کیا ہے کہ اس کے مجاہدین نے جنوبی غزہ میں قابض اسرائیلی فوج کے متعدد اہداف پر کارروائیاں کی ہیں اور ایک صیہونی فوجی کو گرفتار کرنے کی کوشش بھی کی ہے۔

القسام بریگیڈز نے اپنے بیان میں بتایا کہ بدھ کی دوپہر اس کے مجاہدین نے غزہ کے جنوبی علاقے تل الہوا کے جنوب میں واقع نیتساریم محور پر دشمن کے فوجی ٹھکانے "الاحواض” پر حملہ کیا۔

بیان کے مطابق مجاہدین نے انتہائی قریب سے قابض اسرائیلی فوج کے سپاہیوں کے ساتھ براہِ راست جھڑپ کی جس کے نتیجے میں متعدد دشمن فوجی ہلاک اور زخمی ہوئے۔

القسام بریگیڈز نے مزید بتایا کہ اس کے مجاہدین نے دو صیہونی ٹینکوں کو بھی نشانہ بنایا ایک پر یاسین 105 اور دوسرے پر تینڈم قسم کا راکٹ داغا گیا جس سے ٹینکوں کو شدید نقصان پہنچا۔

القسام بریگیڈز کے مطابق اس کارروائی کے دوران قاتل اسرائیلی فضائیہ کے ہیلی کاپٹروں کو ہلاک اور زخمی فوجیوں کو نکالنے کے لیے اترتے ہوئے دیکھا گیا اور یہ انخلاء کا عمل ایک گھنٹے سے زائد عرصے تک جاری رہا۔

واضح رہے کہ قابض اسرائیل کی جانب سے غزہ کے خلاف نسل کشی پر مبنی جنگ کے آغاز یعنی ساتھ اکتوبر 2023 سے فلسطینی مزاحمتی گروہ مسلسل مختلف محاذوں پر قابض فوج کے خلاف ڈٹے ہوئے ہیں اور روزانہ کی بنیاد پر دشمن فوج کو بھاری جانی و مالی نقصان پہنچا رہے ہیں۔