غزہ (روز نامہ قدس ۔آن لائن خبر رساں ادارہ) اسلامی تحریک مزاحمت (حماس) کے سیاسی شعبے کے صدر اسماعیل ھنیہ کے بھائی الحاج خالد ھنیہ کی وفات پر فلسطین اور بیرون ملک سے اہم شخصیات کی جانب سے تعزیت کا سلسلہ جاری ہے۔ خیال رہےکہ الحاج خالد ھنیہ جمعرات اور جمعہ کی درمیانی شب انتقال کر گئے تھے۔
روز نامہ قدس کو موصول ہونے والی اطلاعات کے مطابق اسماعیل ھنیہ کے دفتر سے جاری بیان میں کہا گیا ہے کہ اندرون اور بیرون ملک سے تعزیت کا سلسلہ جاری ہے۔ قطر کے وزیر دفاع ڈاکٹر خالد العطیہ، فلسطینی پارلیمنٹ کے رکن محمد دحلان، پی ایل او کی ایگزیکٹو کمیٹی کے سیکرٹری اور سینیر فلسطینی سیاست دان صائب عریقات اور پی ایل او کے رکن تیسیرخالد نے اسماعیل ھنیہ کو ٹیلی فون کیا اور ان سے تعزیت کی۔
اسماعیل ھنیہ کو ان کے بھائی کی وفات پر تعزیت کرنے والوں میں فتح کی مرکزی کمیٹی کے رکن جبریل الرجوب اور دیگر رہنما بھی شامل ہیں۔تعزیت کرنے والے رہنمائوں نے اسماعیل ھنیہ کے ساتھ ہمدردی، پسماندگان کے لیے صبر جمیل کی دعا کی۔