حماس کی پولیٹیکل بیورو کے رکن عزت الرشق نے اسرائیل کی جانب سے فلسطینی ارکان پارلیمنٹ کو جیل میں رکھنے کی شدید مذمت کی ہے اور اسے ممبر پارلیمان یاسر منصور کی صحت کا پورا پورا ذمہ دار قرار دیا ہے۔
ممبر پارلیمان یاسر منصور نے اپنی انتظامی حراست کے خلاف حال ہی میں بھوک ہڑتال کا سلسلہ شروع کیا ہے۔ رشق کی جانب سے جاری کئے جانے والے بیان میں اسرائیلی جیلوں میں قید فلسطینی ممبران پارلیمنٹ کی رہائی کے لئے عالمی قانون سازوں سے مداخلت کرنے کا مطالبہ کیا۔انہوں نے کویت میں ہونے والی 20 ویں عرب انٹر پارلیمنٹری یونین کے اجلاس کے موقع کا فائدہ اٹھانے پر زور دیتے ہوئے کہا کہ اس فورم کا استعمال کرتے ہوئے فلسطینی قانون سازوں کی رہائی کا مطالبہ کیا جائے۔
اسی تناظر میں احرار سنٹر برائے اسیران نے نابلس کے الشہداء سکوائر پر یاسر منصور کی حمایت میں ایک دھرنے کا اہتمام کیا جس میں کئی نامور فلسطینی شخصیات اور عام شہریوں کی بڑی تعداد نے شرکت کی۔ شرکاء نے یاسر منصور کی رہائی کا مطالبہ کیا۔