مغربی کنارے کے تاریخی شہر الخلیل میں اسرائیلی فوج کی فلسطینیوں کے ساتھ شدید جھڑپیں ہوئی ہیں۔ ادھر شہر کے جنوبی گاؤں خرسا سے صہیونی اہلکاروں نے دو فلسطینی شہریوں کو گرفتار کر لیا ہے۔
ذرائع کے مطابق اسرائیلی فوج نے الفوار کیمپ پر مغربی جانب اور مشرقی جانب سے دھاوا بول دیا۔ عینی شاہدین نے ’’مرکز اطلاعات فلسطین‘‘ کو بتایا کہ الفوار کیمپ کے داخلی راستے پر شروع ہونے والی جھڑپیں انتہائی شدید تھیں، فلسطینی نوجوانوں نے اسرائیلی فوج پر شدید پتھراؤ کیا۔
اسی علاقے میں اسرائیلی فوج کی فائرنگ سے حماس کے معروف کارکن محمود الطیطی کی شہادت کے بعد فلسطینی نوجوانوں نے مشتعل ہوکر اسرائیلی فوج پر گھریلو ساختہ پٹرول بم بھی برسائے اور صہیونی جارحیتوں کے خلاف شدید احتجاج کیا۔
عینی شاہدین نے بتایا کہ اسرائیلی فوج نے فلسطینی نوجوانوں پر اشک آور گیس کے شیلوں کی بوچھاڑ کر دی اور تشدد کرکے متعدد کو زخمی کردیا۔ صہیونی فوجیوں کی بڑی تعداد علاقے میں گشت کرتی رہی۔
بشکریہ:مرکز اطلاعات فلسطین