قبہا نے اتوار کے روز بتایا ہے کہ سید اور برغوثی نے بھی انتظامی اسیران کی حمایت میں بھوک ہڑتال کرنے کا فیصلہ کیا ہے۔ ان کی بھوک ہڑتال کا مقصد قابض حکام پر دبائو بڑھانا ہے تاکہ انتظامی حراست کی پالیسی کو ختم کیا جاسکے۔
سابق وزیر نے بتایا ہے کہ لمبے عرصے کے لئے سزا یافتہ فلسطینی اسیران نے بھی اپنے مطالبات کی منظوری نہ ہونے کے نتیجے میں انتظامی اسیران کی بھوک ہڑتال میں شمولیت اختیار کرنے کی دھمکی دی ہے۔
انہوں نے ریڈ کراس سے مطالبہ کیا کہ وہ اپنی ذمہ داریاں نبھائے اور اسرائیلی جیلوں میں قید تنہائی میں ڈالے گئے فلسطینیوں کی حالت کا معائنہ کرے۔ انہوں نے یہ بھی مطالبہ کیا کہ اسرائیلی جیل انتظامیہ کی جانب سے بھوک ہڑتال کرنے والے اسیران کے خلاف چلائی جانیوالی مہم کو روکنے کے لئے اقدامات اٹھائے جائیں۔
اسرائیلی جیلوں میں قید انتظامی اسیران نے بارہ دن قبل بھوک ہڑتال کا آغاز کیا تھا اور انتظامی حراست کی اسرائیلی پالیسی کے خاتمے کے لئے بھوک ہڑتال اس وقت تک جاری رکھیں گے جب تک ان کے مطالبات پورے نہیں ہوجاتے ہیں۔