اسلامی تحریک مزاحمت ۔ حماس کے ترجمان فوزی برھوم نے غزہ کی مساجد، بے گناہ شہریوں اور بچوں کو ہدف بنانے والے حالیہ اسرائیلی حملوں کی شدید مذمت کی ہے۔
انہوں نے کہا کہ غزہ کے مختلف علاقوں پر حالیہ بمباری سے اسرائیل نے اپنے جنگی جرائم میں مزید اضافہ کرلیا ہے۔
فوزی برھوم کے ’’مرکز اطلاعات فلسطین‘‘ کو موصول ہونے والے بیان میں کہا گیا ہے کہ حماس غزہ پر کیے گئے حالیہ اسرائیلی حملے، جس میں شہریوں، بچوں اور مساجد کو ہدف بنایا گیا، کو انتہائی خطرناک قرار دیتی ہے۔ بے گناہ فلسطینیوں کے خون بہانے کی اس نئی کارروائی کی عالمی اور قومی سطح پر شدید مذمت ہونا چاہے۔ انہوں نے کہا کہ امریکا کی جانب سے اسرائیل کی غیر مشروط حمایت اور عالمی اداروں کی مجرمانہ خاموشی ہی اسرائیل کو آئے روز بے گناہ فلسطینیوں کا خون بہانے پر اکساتی ہے۔
حماس ترجمان نے کہا اس حملے اور اس میں پہنچنے والے نقصان کی ساری ذمہ داری اسرائیلی حکومت پر عائد ہوتی ہے۔انہوں نے فلسطینی، عرب اور اسلامی حلقوں سے مطالبہ کیا کہ وہ فلسطینی قوم کو صہیونی مظالم سے نجات دلوانے کے لیے اپنا اپنا کردار ادا کریں۔ حماس نے مطالبہ کیا کہ امت مسلمہ فلسطینی قوم کو آئے روز کے اسرائیلی حملوں سے بچانے کے لیے ایک متحرک اور ٹھوس حکمت عملی تشکیل دے۔
خیال رہے کہ اتوار اور پیر کی شب شہرغزہ کی پٹی کے جنوب میں رفح بارڈر کے قریب صہیونی فوج کے ایف سولہ جنگی جہازوں نے رات گئے بمباری کی تھی جس کے نتیجے میں کم سے کم دس افراد زخمی ہوگئے ہیں۔ زخمیوں میں سے بعض کی حالت خطرے میں ہے۔ علاوہ ازیں پیر کی صبح اسرائیلی بمباری میں مزید چار افراد زخمی ہوچکے ہیں۔
بشکریہ: مرکز اطلاعات فلسطین