(روزنامہ قدس ۔آن لائن خبر رساں ادارہ) خالد مشعل کا کہنا ہے کہ بزدل صہیونی فوج نے رات کی تاریکی میں سوتےہوئے کمانڈر کو نشانہ بنا کر یہ ثابت کیا ہے کہ دُشمن میں فلسطینی مجاھدین کا آمنا سامنا کرنے کی صلاحیت نہیں۔
اسلامی تحریک مزاحمت’حماس’ کے سیاسی شعبے کے سابق سربراہ خالد مشعل نے اسلامی جہاد کی قیادت اور غزہ میں گذشتہ ہفتے اسرائیلی حملے میں شہید ہونے والے کمانڈر بہاء ابو العطاء کے والد سے ٹیلیفون پر گفتگو کرتے ہوئے کہا ہے کہ کمانڈر ابو العطاء کی شہادت کے واقعے نے صہیونی دشمن کے جرائم کو ایک بار پھر بے نقاب کردیا ہے۔
انہوں نے کمانڈر العطاء کی جہاد اور تحریک آزادی فلسطین کے لیے دی جانے والی قربانیوں کو خراج عقیدت پیش کیا اور فلسطینی مجاھدین کی طرف سے صہیونی دشمن کے خلاف پامردی سے لڑنے کے جذبے کو سراہا
سابق حماس سربراہ خالد مشعل نے اسلامی جہاد کے شہید کمانڈر ابو العطاء کی قربانی کو فلسطین کی آزادی کے لیے اہم سنگ میل قرار دیتے ہوئے کہا ہے کہ فلسطینی شہداء پوری قوم کے ہیرو ہیں شہداء کے خون کے ساتھ غداری کرنے والوں کو معاف نہیں کیا جائے گا۔خیال رہے کہ گذشتہ ہفتے اسرائیلی فوج نے غزہ کی پٹی میں فضائی حملوں کے دوران اسلامی جہاد کے کمانڈر بہاء ابوالعطاء اور ان کی اہلیہ سمیت 35 فلسطینیوں کو شہید کردیا تھا۔