غزہ کی پٹی سے جنوبی فلسطین میں راکٹ داغے جانے اسرائیلی دعویٰ

اسرائیل کے فوجی حکام نے دعویٰ کیا ہے کہ جمعرات کی شام فلسطین کے علاقے غزہ کی پٹی سے جنوبی فلسطین میں ایک راکٹ پھینکا گیا جو آبادی سے دور گر کرپھٹا ہے تاہم اس کے نتیجے میں کسی قسم کا جانی نقصان نہیں ہوا ہے۔

اسرائیل کے عبرانی اخبار’’یدیعوت احرونوت‘‘ نے اپنی ویب سائیٹ پرشائع رپورٹ میں فوجی ذرائع کے حوالے سے اطلاع دی ہے کہ غزہ کی پٹی سے داغا گیا ایک راکٹ جنوبی فلسطین میں شاعر ھینیگیو کے مقام پر گرکر پھٹا ہے۔ ویران علاقے میں گرنے والے راکٹ سے کسی قسم کا جانی نقصان نہیں ہوا ہے۔

ذرائع کا مزید کہنا ہے کہ فوج نے راکٹ کی باقیات جمع کرنے کے بعد اس کی تحقیقات شروع کردی ہیں۔

قبل ازیں غزہ کی پٹی سے متصل یہودی کالونیوں میں جمعرات کی شام خطرے کے سائرن بجائے گئے تھے۔ صہیونی عسکری حکام کی جانب سے یہودی آباد کاروں سے کہا گیا تھا کہ راکٹوں کاخطرہ ہے اس لیے وہ غیر ضروری طورپر گھروں سے باہر نکلنے سے گریز کریں۔

اسرائیل کے عبرانی ٹی وی کی رپورٹ میں بھی بتایا گیا ہے کہ غزہ کی پٹی کے قریب کئی یہودی کالونیوں میں خطرے کے سائرن سنےگئے ہیں۔

خیال رہے کہ غزہ کی پٹی اور اسرائیل کے درمیان کشیدگی روز کا معمول ہے۔ پچھلے ایک عشرے میں غزہ کی پٹی تین بار اسرائیل کا میدان جنگ بن چکی ہے۔ اسرائیل ہربار فلسطینی مزاحمت کاروں کے نام نہاد راکٹ حملوں کو جواز بنا کر غزہ کی پٹی پر آتش وآہن کی بارش شروع کردیتا ہے۔ پچھلے سال جولائی اور اگست کے دوران 51 دن تک مسلسل وحشیانہ بمباری کے دوران 2300 سے زیادہ فلسطینی شہید اور 11 ہزار کو زخمی کردیا گیا تھا۔

بشکریہ:مرکزاطلاعات فلسطین