غزہ میں قتل عام پرفلسطین بھرمیں سوگ، شٹرڈاؤن ہڑتال

فلسطینی شہرغزہ کی پٹی میں اسرائیلی فوج کی وحشیانہ بمباری اور نہتے شہریوں کو شہید کیے جانے کے خلاف فلسطین بھر میں اسرائیل کے خلاف سخت غم وغصے کی فضاء پائی جا رہی ہے۔ گذشتہ روز غزہ کی پٹی میں الشجاعیہ کے مقام پر نہتے فلسطینیوں کے بدترین قتل عام پر آج فلسطین بھر میں یوم سوگ منایا جا رہا ہے، جبکہ مغربی کنارے اور مختلف شہروں میں صہیونی جارحیت کے خلاف احتجاجی مظاہرے بھی جاری ہیں۔ اطلاعات کے مطابق  صہیونی جارحیت کے خلاف بہ طوراحتجاج آج مقبوضہ مغربی کنارے، مقبوضہ بیت المقدس اور شمالی اور جنوبی فلسطین کے تمام شہروں میں شٹرڈاؤن اور پہیہ جام ہڑتال کے ساتھ ساتھ اسرائیل کے خلاف احتجاجی مظاہرے بھی جاری ہیں۔

مرکز اطلاعات فلسطین کے مطابق غزہ کی پٹی پر صہیونی جارحیت کے خلاف مغربی کنارے کی تاجر برادری نے آج تمام کاروباری مراکز بند رکھنے کا اعلان کیا ہے جبکہ ٹرانسپورٹ یونین کی جانب سے مغربی کنارے میں پہیہ جام ہڑتال کی کال دی ہے۔ ہڑتال کے دوران سڑکوں پر ٹریفک نہ ہونے کے برابر ہے تاہم مرکزی شہروں رام اللہ، الخلیل اور بیت المقدس میں صہیونی بربریت کےخلاف احتجاجی ریلیاں نکالی جا رہی ہیں۔

ادھر آج سوموار کو علی الصباح ڈرائیور یونین نے غزہ کے مظلوم عوام کے ساتھ اظہار یکجہتی کے لیے ایک ریلی کا اہتمام کیا، جس میں عام شہریوں اور ٹرانسپورٹ سے وابستہ افراد کی بڑی تعداد نے شرکت کی، مظاہرین نے ہاتھوں میں بینرز اور کتبے اٹھا رکھےتھے جن پرغزہ کی صہیونی فوجی جارحیت بند کرانے اور اسرائیل کو انصاف کے کٹہرے میں لانے کے مطالبات درج تھے۔

خیال رہے کہ مغربی کنارےمیں پچھلے دو ہفتے سے صہیونی فوجی جارحیت کے خلاف احتجاج کا سلسلہ جاری ہے، جس کے نتیجے میں نظام زندگی مفلوج ہوکر رہ گیا ہے۔ احتجاج کے باوجود صہیونی جارحیت کا سلسلہ بدستور جاری ہے اور اب تک کم سےکم پانچ سو سے زائد فلسطینی شہید اور ساڑھے تین ہزار کے لگ بھگ زخمی ہوچکے ہیں۔