غزہ (روز نامہ قدس ۔آن لائن خبر رساں ادارہ) غزہ کی پٹی میں احتجاجی مظاہروں کے دوران اسرائیلی فوج کی فائرنگ سے زخمی ہونے والاایک فلسطینی شہری گذشتہ روز زخموں کی تاب نہ لاتے ہوئے اسپتال میں دم توڑ گیا۔
روز نامہ قدس کو موصول ہونے والی اطلاعات کے مطابق 22 سالہ فلسطینی بسام سامی عثمان صافی 22 فروری کو غزہ کے وسط میں خان یونس کے مقام پر اسرائیلی فوج کی فائرنگ سے زخمی ہوگیا تھا۔ اسے علاج کے لیے ایک مقامی اسپتال منتقل کیا گیا جہاں وہ زخموں کی تاب نہ لاتے ہوئے سوموار کو علی الصباح شہید ہوگیا۔
خیال رہے کہ 30 مارچ 2018ء کے بعد سے غزہ میں جاری احتجاج کے دوران اب تک 270 فلسطینی شہید اور 29 ہزار زخمی ہوچکے ہیں۔ شہداء میں 193 بچے، 3 امدادی کارکن، دو صحافی شامل ہیں۔