خیال رہے کہ یہ حادثہ مشرقی غزہ میں الشجاعیہ کالونی میں اس وقت پیش آیا تھا جب اسلامی تحریک مزاحمت”حماس” کے عسکری ونگ القسام بریگیڈ کے کارکن ایک سرنگ میں جہادی تربیت میں مصروف تھے۔ اس دوران اچانک دھماکے سے سرنگ بیٹھ گئی اور پانچ مجاہدین موقع پر شہید ہو گئے تھے۔
فلسطینی وزارت صحت کے ترجمان ڈاکٹر اشرف قدرہ نے "مرکز اطلاعات فلسطین” کو بتایا کہ سرنگ حادثے میں مارے جانے والے دو افراد کے جسد خاکی غزہ میں الشفاء میڈیکل کمپلیکس میں لائے گئے ہیں۔ دو دیگر مزاحمت کاروں کی میتیں بھی نکال لی گئی ہیں تاہم پانچویں مجاہد کی نعش کی تلاش جاری ہے۔
ایک سوال کے جواب میں ڈاکٹر القدرہ نے بتایا کہ شہداء کی شناخت رائد مرشود، ابراہیم العرقان، خلیل الغرابلی، اور سلیم الحرازین کے ناموں سے کی گئی ہے۔
قبل ازیں جمعہ کو حماس اور القسام بریگیڈ کی جانب سے جاری بیانات میں سرنگ کے حادثے میں پانچ قیمتی جانوں کے ضیاع پر گہرے دکھ کا اظہار کرتے ہوئے شہید مجاہدین کے اہل خانہ سے ہمدردی کا اظہارکیا گیا تھا۔