(روز نامہ قدس ۔آنلائن خبر رساں ادارہ) انڈونیشیا کی مساجد کونسل نے اعلان کیا ہے کہ وہ غیر قانونی صیہونی ریاست اسرائیل کی دہشتگردی کا شکار غزہ میں جدید طرز تعمیر کی 100 مساجد کو تعمیر کرے گی۔
انڈونیشیا کے سابق نائب صدر اور موجودہ انڈونیشی مساجد مینجمنٹ کونسل کے چیئرمین محمد یوسف کلہ نے غزہ کی موجودہ صورتحال سے انڈونیشیائی عوام کو آگاہ کرنے کی ضرورت پر زور دیتے ہوئے کہا کہ غزہ میں ڈیڑھ سال کے دوران اسرائیلی دہشتگردی میں 1,000 سے زائد مساجد شہید ہو چکی ہیں۔
یوسف کلہ نے مزید بتایا کہ "ہم نے ابتدائی طور پر 10 نیم مستقل مساجد بنانے کا فیصلہ کیا ہے، اور ہمارا مقصد یہ تعداد 100 تک پہنچانا ہے۔” انہوں نے امید ظاہر کی کہ انڈونیشیا کے نمازی اپنے زکوٰۃ اور خیرات کا 5 سے 10 فیصد غزہ کی مساجد کی تعمیر میں مدد کے لیے دیں گے۔
انہوں نے مزید کہا کہ "ہم نے غزہ میں متعلقہ حکام سے رابطہ کیا ہے تاکہ تعمیراتی عمل کو مؤثر طریقے سے شروع کیا جا سکے۔”
یوسف کلہ نے انڈونیشیا کے نمازیوں سے اس مہم میں حصہ لینے کی درخواست کی، اور تباہ شدہ مساجد کی تعمیر نو میں بھرپور تعاون کی اپیل کی۔
غزہ میں جنگ بندی 19 جنوری 2025 کو شروع ہوئی تھی، جس کا پہلا مرحلہ 42 دن تک جاری رہے گا۔ اس دوران مصر، قطر اور امریکہ کی ثالثی میں مزید مذاکرات ہوں گے تاکہ دوسرے اور تیسرے مرحلے کی تیاری کی جا سکے۔