فلسطینی محصور شہرغزہ کی پٹی میں خلیجی ریاست قطر کے تعاون سے تعمیر نو کے ایک نئے منصوبے پر کام شروع کیا گیا ہے جس پر پچاس کروڑ لاگت آئے گی۔
مرکزاطلاعات فلسطین کےمطابق غزہ کی پٹی میں تعمیر نو کے پروگرام کے قطری نگراں انجینیئر محمد العمادی نے تعمیراتی منصوبوں پر کام شروع کرنے کی افتتاحی تقریب سے خطاب کرتے ہوئے کہا کہ ان کی حکومت غزہ کی تعمیرنو کے لیے مزید بھی فنڈز جاری کرے گی۔ انہوں نے بتایا کہ دوحہ حکومت کی جانب سے پچھلے تین سال کے دوران غزہ کی پٹی میں 524 ملین ڈالرز کے تعمیراتی اور ترقیاتی کام مکمل کیے جا چکے ہیں۔
العمادی کا کہنا تھا کہ وہ ایک اعلیٰ سطحی وفد کے ہمراہ غزہ کی پٹی میں پہنچے ہیں تاکہ یہاں پر تعمیر نو کے نئےمنصوبوں پرکام کا اغاز کیا جاسکے۔ انہوں نے بتایا کہ وہ غزہ کی پٹی میں 10دن تک قیام کریں گے۔ اس دوران ان کی ملاقات حماس کی حکومت کے سربراہ اسماعیل ھنیہ اور دیگر حکومتی عہدیداروں سے بھی ہوگی۔ ان ملاقاتوں میں وہ شہر میں تعمیر نو کے نئے منصوبوں کے بارے میں حکومت کو آگاہ کریں گے۔
نئے منصوبوںکے بارے میں بات کرتے ہوئے انہوں نے کہا کہ وہ صلاح الدین روڈ کی تعمیر کے علاوہ وسطی اور جنوبی غزہ میں اسرائیلی فوج کے حملوں اور جنگ کے دوران مسمارہونے والے مکانات کی دوبارہ تعمیر کریں گے۔
خیال رہے کہ گذشتہ جنوری میں فلسطینی وزیراعظم اسماعیل ھنیہ قطر کےدورے پر گئے تھے۔ اس دورے کے دوران امیر قطر نے غزہ کی پٹی میں تعمیر نو میں مدد کے لیے مزید فنڈز جاری کرنے کا اعلان کیا تھا۔
بشکریہ: مرکز اطلاعات فلسطین