غزہ نسل کش جنگ میں تینتس فیصد صہیونی فوجی ذہنی بیماری کا شکار، خودکشیوں کا خدشہ

(روزنامہ قدس ـ آنلائن خبر رساں ادارہ) قابض اسرائیلی فوج کے شعبہ بحالی نے انکشاف کیا ہے کہ اس وقت تقریباً اسی ہزار فوجیوں کا علاج جاری ہے، جن میں سے چھبیس ہزار فوجی نفسیاتی بیماریوں اور شدید ذہنی دباؤ(پی ٹی سی ڈی) جیسے سنگین عوارض میں مبتلا ہیں۔

قابض عبرانی اخبار یدیعوت احرنوت کے مطابق زیرِ علاج اسی ہزار فوجیوں میں سے چھبیس ہزار (تقریباً تینتس فیصد) ذہنی بیماریوں کا شکار ہیں، جن میں سے ایک تہائی سے زائد شدید ذہنی دباؤ (پی ٹی سی ڈی) میں مبتلا ہیں۔

شعبہ بحالی کے سالانہ دو اشاریہ چار ارب شیکل کے بجٹ کا نصف حصہ صرف ان ذہنی مریض فوجیوں کے علاج پر خرچ کیا جا رہا ہے۔

دو ہفتے قبل ذہنی صدموں سے متاثرہ قابض فوجیوں نے بروقت علاج اور مساوی حقوق کا مطالبہ کرتے ہوئے احتجاجی خیمے لگائے تھے۔ وہ جسمانی طور پر زخمی سفاک فوجیوں کی طرح سلوک کا مطالبہ کر رہے تھے۔

قابض فوج کی ایک تحقیقاتی رپورٹ کے مطابق ظالم فوجیوں میں خودکشیوں کی بڑی وجہ غزہ میں درپیش خوفناک جنگی حالات ساتھیوں کی ہلاکت اور طویل عرصے تک جنگی ماحول میں رہنا ہے۔

2025 سےاب تک سولہ قابض اسرائیلی فوجی خودکشیاں کرچکے ہیں (ایک ماہ میں چار)، 2024 میں اکیس صہیونی فوجیوں نے خودکشیاں کیں تھیں، 2023 میں جابر فوجیوں میں خودکشیوں کی تعداد سترہ تھی جبکہ 2022 میں خودکشی کرنے والے غاصب فوجی چودہ تھے۔

یہ اعداد و شمار قابض اسرائیلی فوج میں بڑھتے ہوئے ذہنی بحران کی عکاسی کرتے ہیں، خاص طور پر 7 اکتوبر 2023 کو غزہ پر نسل کشی کی جنگ مسلط کرنے کے بعد، جس میں اب تک دو لاکھ بارہ ہزار سے زائد فلسطینی شہید اور زخمی ہو چکے ہیں۔