(روزنامہ قدس ـ آنلائن خبر رساں ادارہ) القسام بریگیڈز نے جمعرات کے روز ایک پیغام کے ذریعے قابض اسرائیلی فوج کے سپاہیوں کو براہ راست مخاطب کرتے ہوئے کہا کہ انہیں قتل کرنے کے بجائے پکڑنے اور جنگی قیدی بنانے کو ترجیح دی جائے گی۔
اس ویڈیو پیغام میں جو براہ راست غزہ کی میدان جنگ سے دشمن کے سپاہیوں کے لیے ریکارڈ کیا گیا القسام بریگیڈز نے دوٹوک الفاظ میں کہاکہ”اے قابض اسرائیل کے نازی سپاہیوں! جان لو کہ ہمارے بے خوف اور جانباز مجاہدین تم تک ضرور پہنچیں گے”۔
پیغام میں مزید کہا گیا کہ اگر تم لڑنے کا فیصلہ نہ کرو اور اپنی جان بچانا چاہتے ہو، تو اپنا اسلحہ پھینک دو، دونوں ہاتھ اٹھاؤ اور میدان جنگ میں دی گئی ہدایات پر عمل کرو۔
القسام بریگیڈز نے یہ پیغام انتہائی واضح اور حوصلہ افزا انداز میں مکمل کیا کہ قید کرنا قتل کرنے سے بہتر ہے۔ اس کے ساتھ انہوں نے یہ وعدہ بھی کیا کہ جو بھی دشمن فوجی گرفتار کیا جائے گا اوراس کی زندگی کا تحفظ کیا جائے گا ۔
پیغام کے اختتام پر ایسے مناظر بھی دکھائے گئے جن میں ماضی میں غاصب فوجیوں کو قیدیوں کے تبادلے کے دوران آزاد کرتے ہوئے دکھایا گیا جس سے واضح ہوتا ہے کہ القسام بریگیڈز اپنے وعدوں کی پابند ہے۔
اسی ویڈیو میں ان کارروائیوں کی جھلکیاں بھی شامل تھیں جن میں القسام بریگیڈز نے جنگ کے دوران قابض صہیونی فوجیوں کو گرفتار کرنے کی کوشش کی۔ حالیہ دنوں کی ایک جھلک میں دیکھا گیا کہ عبسان کے علاقے میں القسام کے مجاہدین نے دشمن کی ایک بکتر بند گاڑی کو نشانہ بنایا جس سے ایک قابض فوجی باہر نکلا تو مجاہدین نے فوری طور پر اسے قابو میں لینے کی کوشش کی تاہم جھڑپ کے دوران وہ ہلاک ہو گیا اور اس کا اسلحہ غنیمت میں لے لیا گیا۔
یہ پیغام اس بات کی غمازی کرتا ہے کہ قابض دشمن کی وحشیانہ جنگ کے باوجود فلسطینی مزاحمت کا حوصلہ بلند ہے اور القسام بریگیڈز نہ صرف میدان جنگ میں دشمن کو چیلنج کر رہی ہے بلکہ نفسیاتی محاذ پر بھی اسے شکست دینے کے لیے تیار ہے۔
