غزہ میں نسل کشی جاری، مزید 94 فلسطینی شہید، 367 زخمی

(روزنامہ قدس ـ آنلائن خبر رساں ادارہ) قابض اسرائیل کی جانب سے جاری خون آشام جارحیت نے ایک اور ہولناک دن رقم کر دیا۔ پچھلے 24 گھنٹوں کے دوران غزہ کی بے گناہ سرزمین پر چورانوے فلسطینی شہید اور تین سو سڑسٹھ زخمی ہوئے۔

فلسطین کی وزارت ِصحت نے اپنی تازہ رپورٹ میں بتایا کہ شہداء کی یہ تعداد گزشتہ ایک دن میں درج ہوئی ہے جن میں ایسی لاشیں بھی شامل ہیں جو ملبے سے نکالی گئیں۔رپورٹ کے مطابق اب بھی کئی بے گناہ افراد ملبے کے نیچے ہیں جن تک امدادی ٹیمیں اور شہری دفاع کے اہلکار مسلسل قابض فوجی حملوں کے باعث پہنچ نہیں پا رہے۔

وزارت ِصحت نے بتایا کہ ساتھ اکتوبر سنہ2023ء سے لے کر اب تک قابض صہیونی حکومت کی جاری درندگی نے غزہ میں اٹھاون ہزار چھ سو سڑسٹھ فلسطینی شہید کر دیے ہیں جب کہ ایک لاکھ انتالیس ہزار نو سو چوہترافراد مختلف نوعیت کے زخموں سے چور ہیں۔

اسی طرح اٹھارہ مارچ سنہ2025ء سے جب قابض اسرائیل نے سیز فائر کی کھلم کھلا خلاف ورزی کرتے ہوئے ایک بار پھر خون بہایااب تک کی شہادتوں کی تعداد ساتھ ہزار آٹھ سو تینتالیس ہو چکی ہے اور زخمیوں کی گنتی ستائیس ہزار نو سو تینتس تک پہنچ چکی ہے۔

رپورٹ میں بتایا گیا کہ گزشتہ چوبیس گھنٹوں میں بھی امدادی قافلوں کے ذریعے لائے گئے مظلوم فلسطینیوں میں سے چھبیس افراد جام شہادت نوش کر گئے اور بتیس سے زائد زخمی حالت میں ہسپتال پہنچائے گئے۔

اسی طرح صہیونی درندگی کی بھینٹ چڑھنے والے خوراک کی تلاش میں نکلے فلسطینیوں کی مجموعی تعدادبڑھ کر آٹھ سو ستتر شہداء اور پانچ ہزار چار سو بتیس زخمیوں تک پہنچی چکی ہے۔

فلسطینی عوام آج بھی اپنے خون سے یہ گواہی دے رہے ہیں کہ ان کا نصب العین آزادی، واپسی اور عزت کی زندگی ہے۔ وہ دنیا کی بے حسی کے باوجود، ایک ظالم اور نسل کش قابض ریاست کے سامنے سینہ سپر ہیں۔ دنیا خاموش ہے، لیکن غزہ چیخ چیخ کر انسانیت کو جگا رہا ہے۔