غزہ (روز نامہ قدس ۔آن لائن خبر رساں ادارہ) فلسطین کی حج ٹور آپریٹر کمپنیوں کی طرف سے کہا گیا ہے کہ مصر کی حکومت نے غزہ کی پٹی کے عمرہ زائرین کو حجاز مقدس سفر کے لیے سہولیات کی فراہمی کی اجازت دے دی ہے۔
روز نامہ قدس کو موصول ہونے والی اطلاعات کے مطابق فلسطینی حج ٹور آپریٹرز کے مطابق مصری حکومت کی طرف سے غزہ کے عمرہ زائرین کو اجازت ملنے کےبعد آئندہ سال کے آغاز معتمرین کے قافلے چلنا شروع ہوجائیں گے۔
حج ٹور آرگنائزیشن عوض ابو مذکور نے بتایا کہ مصر کی طرف سے فلسطینی اوقاف کی طرف سے دی گئی درخواست پر یہ فیصلہ کیاگیا ہے۔ حال ہی میں فلسطینی حج وعمرہ کمپنیوں اور مصری سیکیورٹی اداروں کے درمیان ایک معاہدہ طے پایا تھا جس میں غزہ کے عازمین عمرہ کو مصر کے راستے حجاز مقدس جانے کی اجازت دی گئی تھی۔
ابو مذکور نے بتایا کہ چار سال سے غزہ کی ٹور آپریٹر کمپنیوں کو عمرہ سروسز نہ ہونے کی وجہ سے سالانہ دو ملین ڈالر سے زائد کا نقصان اُٹھانا پڑتا تھا۔
ابو مذکور نے کہا کہ غزہ کی پٹی کے عمرہ زائرین کی حجاز مقدس سفر کے لیے تکنیکی اور انتظامی تیاریاں جاری ہیں۔ تاہم ان کا کہنا تھا کہ سوشل میڈیا پر معتمرین کی تعداد درست نہیں بتائی جارہی ہے۔ اس حوالے سے فلسطینی محکمہ اوقاف اور مذہبی امور تفصیلات جاری کریں گے۔