غزہ (روز نامہ قدس ۔آن لائن خبر رساں ادارہ) اسلامی تحریک مزاحمت (حماس) کے سیاسی شعبے کے سربراہ اسماعیل ھنیہ نے قطر کے امیر تمیم بن حمد آل ثانی سے ٹیلیفون پر بات چیت کی اور محصورین غزہ کو سہولیات کی فراہمی سے متعلق ہونے والی کوششوں پر تبادلہ خیال کیا۔
روز نامہ قدس کو موصول ہونے والی اطلاعات کے مطابق اسماعیل ھنیہ امیر قطر کی طرف سے غزہ کی ناکہ بندی ختم کرانے کے لیے کی جانے والی کوششوں کو سراہا۔ ان کا مزید کہنا تھا کہ قطر نے غزہ میں انسانی بہبود اور تعمیر نو کے شعبوں میں کلیدی کردار ادا کیا ہے۔
دوسری جانب امیر قطر نے فلسطینیوں کے حقوق کے لیے جاری ہر سطح پر جدوجہد کی حمایت کے عزم کا اظہار کیا۔ ان کا کہنا تھا کہ غزہ کے عوام کی بہبود کے لیے ہر ممکن اقدام اور مدد کریں گے۔
خیال رہے کہ مصر کی کوششوں سے غزہ کی پٹی پرعائد کی گئی پابندیوں میں نرمی کے لیے مؤثر کوششیں کی جا رہی ہیں۔ اسماعیل ھنیہ نے ان کوششوں کے بارے میں بھی امیر قطر کو اعتماد میں لیا۔