غزہ کی تعمیرِ نو اولین ترجیح، امت عربی کو دوگنی اجتماعی کوششیں کرنا ہوں گی:عرب پارلیمنٹ

 (روزنامہ قدس ـ آنلائن خبر رساں ادارہ) عرب پارلیمنٹ کے سربراہ محمد بن احمد الیماحی نے زور دیا ہے کہ عرب دنیا اور عالمی برادری کو اپنی تمام تر توانائیاں مجتمع کر کے غزہ کی فوری تعمیرِ نو کے لیے عملی اقدامات کرنے ہوں گے تاکہ قابض اسرائیل کی درندگی سے تباہ حال علاقے کے عوام کے زخموں پر مرہم رکھا جا سکے۔

جنیوا میں منعقدہ بین الاقوامی پارلیمانی یونین کے 151ویں جنرل اجلاس سے قبل عرب پارلیمانی گروپ کے مشاورتی اجلاس سے خطاب کرتے ہوئے الیماحی نے کہا کہ ’’اس وقت موجود عالمی سیاسی فضا کو بھرپور طور پر استعمال کرتے ہوئے فلسطینی ریاست کے بڑھتے ہوئے بین الاقوامی اعتراف کو عملی شکل دینا ناگزیر ہے‘‘۔

انہوں نے کہا کہ ’’یہ اجلاس عرب پارلیمانوں کے درمیان گہرے رابطے اور یکجہتی کا مظہر ہے، اور ایسے نازک وقت میں منعقد ہو رہا ہے جب دو برس تک جاری رہنے والی قابض اسرائیل کی نسل کش جنگ کے خاتمے کا معاہدہ طے پایا ہے‘‘۔

الیماحی نے اس پیش رفت کو انتہائی اہم اور خطے میں پائیدار امن و استحکام کی جانب پہلا سنجیدہ قدم قرار دیا۔

انہوں نے یقین دلایا کہ عرب پارلیمنٹ ہمیشہ عرب بین الاقوامی پارلیمانی اتحاد کے ساتھ تعاون کے لیے تیار ہے تاکہ عرب موقف کو متحد کیا جا سکے، امت کے ضمیر کی نمائندگی کرنے والی آواز بلند ہو، اور فلسطینی قوم کے منصفانہ و برحق مقدمے کا دفاع مضبوط دلائل کے ساتھ کیا جا سکے۔