غزہ میں ہولناک صہیونی حملہ، خاتون فلسطینی صحافی اسلام عابد شہید

(روزنامہ قدس ـ آنلائن خبر رساں ادارہ) فلسطینی حکومتی میڈیا آفس کے مطابق اتوار کو غزہ میں خاتون صحافی اسلام موحارب عابد سفاک اسرائیلی حملے میں شہید ہوگئیں۔ بیان میں کہا گیا کہ خاتون صحافی فلسطین کے القدس الیوم سیٹلائٹ چینل کے لیے کام کرتی تھیں۔

حکومتی میڈیا آفس نے اپنے بیان میں کہا کہ ہم فلسطینی صحافیوں کو قابض اسرائیل کی جانب سے نشانہ بنانے اور شہید کرنے کی شدید ترین الفاظ میں مذمت کرتے ہیں۔ ہم عالمی فیڈریشن آف جرنلسٹس، عرب جرنلسٹس یونین اور دنیا کے تمام ممالک کی صحافتی تنظیموں سے مطالبہ کرتے ہیں کہ وہ غزہ پٹی میں صحافیوں اور میڈیا پروفیشنلز کے خلاف ان منظم جرائم کی مذمت کریں۔

یاد رہے کہ گزشتہ ہفتے غاصب اسرائیل کی جانب سے غزہ کے النصر اسپتال پر حملے میں پانچ صحافی شہید ہوئے تھے۔اس سے قبل اگست کے اوائل میں الجزیرہ کے صحافی انس الشریف غزہ شہر میں صحافیوں کے خیمے پر کیے گئے ظالم اسرائیلی ٹارگٹڈ حملے میں اپنے کئی ساتھیوں کے ساتھ شہید ہو گئے تھے۔

اعداد و شمار کے مطابق، اکتوبر 2023 میں جنگ کے آغاز کے بعد سے غزہ میں صہیونی حملوں میں شہید ہونے والے صحافیوں اور میڈیا ورکرز کی تعداد دو سو اٹھہترہوگئی ہے۔