(روزنامہ قدس ـ آنلائن خبر رساں ادارہ) غزہ میں تباہ کن نسل کشی اور دو سال بے گھر ہونے کے باوجود ایک فلسطینی طالبہ نے اپنے میٹرک امتحانات میں کامیابی حاصل کرنے پر خوشی کا اظہار کیا۔
غزہ کی وزارت ِتعلیم کے مطابق اس سال چھبیس ہزار سے زائد طلبہ و طالبات نے انتہائی مشکل حالات میں امتحانات دیے اس وقت بیشتر اسکول ملبے میں تبدیل ہو چکے ہیں اور کئی خاندان پناہ گزین کیمپوں میں زندگی گزارنے پر مجبور ہیں۔
طالبہ نے کامیابی کے بعد مقامی میڈیا سے گفتگو کرتے ہوئے کہا کہ ہم نے بمباری، بھوک اور خوف کے درمیان پڑھائی کی یہ کامیابی صرف میری نہیں بلکہ ہر اس فلسطینی بچے کی ہے جو امید سے جیتا ہے۔
غزہ میں اس کامیابی کو مزاحمت اور امید کی علامت قرار دیا جا رہا ہے کیونکہ تعلیمی ادارے بارہا حملوں کی زد میں آئے، اساتذہ شہید ہوئے اور کتابیں خاکستر ہو گئیں مگر فلسطینی طلبہ نے ہار نہیں مانی۔
اقوام متحدہ کے مطابق غزہ میں موجود بیشتر طلبہ نے امتحانات پناہ گاہوں، خیموں یا تباہ شدہ اسکولوں کے ملبے پر بیٹھ کر دیے جو فلسطینی عوام کے عزم اور حوصلے کی ایک زندہ مثال ہے۔
