غزہ (روز نامہ قدس ۔آن لائن خبر رساں ادارہ) غزہ کی پٹی میں ہونے والے احتجاجی مظاہروں کے دوران اسرائیلی فوج کی اندھا دھند فائرنگ سے 32 فلسطینی زخمی ہو گئے۔
روز نامہ قدس کو موصول ہونے والی اطلاعات کے مطابق نماز جمعہ کے اجتماعات کے بعد سیکڑوں فلسطینیوں نے غزہ کی مشرقی سرحد پر ’’حق واپسی‘‘ ریلیاں نکالیں اور اسرائیلی حکومت کے خلاف شدید نعرے بازی کی۔ فلسطینی نوجوانوں کی بڑی تعداد نے سرحد کی طرف بڑھنے کی کوشش کی جس پر اسرائیلی فوج نے ان پر اندھا دھند گولیاں چلائیں اور براہ راست فائرنگ کی س کے نتیجے میں 32 فلسطینی مظاہرین زخمی ہو گئے۔
غزہ میں وزارت صحت کے حکام کے مطابق اسرائیلی فوج کی فائرنگ اور آنسو گیس کی شیلنگ سے درجنوں افراد دم گھٹنے سے بے ہوش ہو گئے۔ اسرائیلی فوج کی طرف سے داغا گیا آنسو گیس کا شیل ایک مقامی امدادی کارکن کے چہرہ پر جا لگا جس کے نتیجے میں وہ شدید زخمی ہوگیا جب کہ زخمیوں میں ایک صحافی بھی شامل ہے۔
خیال رہے کہتیس مارچ دو ہزار اٹھارہ سے جاری فلسطینیوں کے گرینڈ واپسی مارچ پر صیہونی فوجیوں کی فائرنگ کے نتیجے میں اب تک 260 سے زائد فلسطینی شہید اور کم از کم 27 ہزار زخمی ہو چکے ہیں۔
فلسطینی عوام نے اپنے حقوق کی بازیابی کے لئے تیس مارچ دو ہزار اٹھارہ سے گرینڈ واپسی مارچ کا آغاز کیا تھا جس کے تحت ہزاروں افراد ہر جمعے کو غزہ سے ملنے والی مقبوضہ فلسطین کی سرحدوں کی جانب مارچ کرتے ہیں۔