غزہ (روز نامہ قدس ۔آن لائن خبر رساں ادارہ) غزہ کی پٹی میں قابض اسرائیلی ریاست کی طرف سے 24 چوبیس گھنٹوں کے دوران وحشیانہ بمباری کا سلسلہ جاری ہے جس میں 30 مکانات مکمل طور پر تباہ اور 500 کو جزوی طور پر نقصان پہنچا ہے۔
روز نامہ قدس کو موصول ہونے والی اطلاعات کے مطابق فلسطینی وزیر برائے ہاؤسنگ و آباد کاری مفید الحساینہ نے بتایا کہ منگل فلسطینی عملے نے اسرائیلی فوج کی وحشیانہ بمباری کے نتیجے میں ہونے والے نقصان کی تفصیلات جمع کرنا شروع کی ہیں۔ اب تک کی تفصیلات کے مطابق اسرائیلی بمباری کے نتیجے میں 30 مکان مکمل طور پر تباہ ہوگئے جب کہ 500 کو جزوری نقصان پہنچا ہے۔ ان میں سے بعض زیادہ متاثر ہوئے ہیں جو رہائش کے قابل نہیں رہے۔
ان کا کہنا تھا کہ فلسطینی حکومت غزہ میں اسرائیلی جارحیت سے ہونے والے نقصان کے ازالے کے لیے عالمی برادری کے ساتھ رابطے جاری رکھے ہوئے ہے۔ بمباری سے بے گھر ہونے والے شہریوں کی آباد کاری کے لیے فوری اقدامات کیے جائیں گے۔
ادھر غزہ میں فلسطینی حکومت کی طرف سے جاری کردہ بیان میں کہا گیا ہے کہ گذشتہ روز اسرائیلی فوج نے غزہ پر 50 فضائی اور زمینی حملے کیے جس کے نتیجے میں 10 فلسطینی زخمی ہوئے ہیں۔
بمباری سے شہریوں کی املاک، زرعی اجناس اور گھروں کو نقصان پہنچا ہے۔ اس کے علاوہ ایک ڈرائیونگ اسکول تباہ اور ایک مسجد بھی شہید ہوگئی ہے۔