غزہ (روز نامہ قدس ۔آن لائن خبر رساں ادارہ) فلسطین کے علاقے غزہ کی پٹی میں ایک عسکری عدالت نے پیر کی صبح اسرائیل کے لیے مخبری کرنے کے الزام میں 14 فلسطینیوں کے خلاف مختلف سزائیں سنائی ہیں۔ ان میں 6 افراد کو موت کی سزا دی گئی ہے۔
روز نامہ قدس کو موصول ہونے والی اطلاعات کے مطابق عدالتی فیصلوں کا اعلان غزہ میں سکیورٹی انتظامیہ کے ترجمان ایاد البزم اور عسکری عدلیہ کی اتھارٹی کے سربراہ جنرل ناصر سلیمان کی پریس کانفرنس میں کیا گیا۔
البزم نے باور کرایا کہ عدالتی فیصلے قابض حکام کے ایجنٹوں کے لیے ایک واضح پیغام ہیں کہ ان کا یہ انجام ہے جس سے فرار ممکن نہیں۔ ترجمان کے مطابق سکیورٹی اداروں نے اہم اور نمایاں کامیابیاں حاصل کیں جن کا نتیجہ قابض حکام کے ایجنٹوں کے گرد گھیرا تنگ ہونے کی صورت میں سامنے آیا ہے۔