غزہ (روز نامہ قدس ۔آن لائن خبر رساں ادارہ) مصری حکام نے فلسطین کے علاقے غزہ کی پٹی کی بین الاقوامی گزرگاہ رفح کراسنگ کو بغیر کسی تعطل کے کھلا رکھنے کے عزم کا اظہار کیا ہے۔
روز نامہ قدس کو موصول ہونے والی اطلاعات کے مطابق فلسطینی نیوز ایجنسی ’’صفا‘‘ نے رپورٹ میں بتایا ہے کہ مصری حکام نے فلسطینی حکام کو یقین دلایا ہے کہ آنے والے عرصے میں رفح گذرگاہ کو دوطرفہ ٹریفک کے لیے کھلا رکھا جائے گا۔
ادھر کل بدھ کے روز غزہ سے 330 فلسطینی بیرون ملک روانہ ہوئے۔ مصری حکام کے مطابق 122 اور غزہ میں فلسطینی حکام نے 208 فلسطینیوں کی بیرون ملک روانگی کی تصدیق کی۔ 15 فلسطینیوں کو بیرون ملک جانے سے روک دیا گیا۔
خیال رہے کہ مصر سے ملحق رفح گذرگاہ پر پر تعینات فلسطینی اتھارٹی نے اپنا عملہ واپس بلا لیا تھا جس کے بعد اب کراسنگ کا فلسطینی کنٹرول اسلامی تحریک مزاحمت (حماس) نے سنبھال لیا ہے۔