فلسطین کے علاقے غزہ کی پٹی میں اسرائیلی فوج کے جنگی طیاروں نے سوموار کو علی الصباح بمباری کی ہے جس کے نتیجے میں اسلامی تحریک مزاحمت "حماس” کے عسکری ونگ القسام بریگیڈ کا ایک کمپائونڈ تباہ ہوا ہے۔
رپورٹ کے مطابق صہیونی فوج کے جنگی طیاروں نے جنوبی غزہ میں الزیتون کالونی میں واقع القسام بریگیڈ کے ایک مرکز کو "ایف 16 ” جنگی طیاروں سے نشانہ بنایا۔مقامی فلسطینی ذرائع کے مطابق اسرائیلی فوج کے جنگی طیاروں نے سوموار کی صبح کو الزیتون کالونی میں واقع "تیونس” سینٹر پر کم سے کم دو میزائل داغے جس کے نتیجے میں مرکز کی عمارت تباہ ہوگئی تاہم میزائل حملوں میں کسی قسم کے جانی نقصان کی تصدیق نہیں ہوئی ہے۔
اسرائیل کے عبرانی ریڈٰیو نے بھی غزہ کی پٹی میں بمباری کی تصدیق کی ہےاور بتایا ہے کہ یہ بمباری گذشتہ روز غزہ کی پٹی سے داغے گئے راکٹوں کے رد عمل میں کی گئی ہے۔