قابض اسرائیلی فوج نے غزہ کی پٹی میں سوموار کو غروب آفتاب کے بعد متعدد مقامات پر بمباری کی ہے جس کے نتیجے میں کئی مکانات کو نقصان پہنچا ہے تاہم کسی قسم کے جانی نقصان کی اطلاع نہیں مل سکی ہے۔
غزہ کے سیکیورٹی ذرائع نے مرکزاطلاعات فلسطین کوبتایا کہ صہیونی فوج کے جنگی جہازوں نے مغرب کے کچھ ہی دیر دیر البلح کے مقام پر اسلامی جہاد کے عسکری ونگ القدس بریگیڈ کے ایک تربیتی مرکز پربمباری کی۔
ادھر وسطی غزہ میں شام کو صہیونی فوج کے جنگی جہازوں نے النصیرات کے مقام پر حماس کے ملٹری ونگ عزالدین القسام شہید بریگیڈ کے مراکز پر گولہ باری کی، جس کے نتیجے میں ایک تین سالہ بچہ محمد بھجت دلال معمولی زخمی ہوگیا۔ زخمی بچے کو شہداء اقصیٰ اسپتال منتقل کردیا گیا ہے، جہاں اس کی حالت خطرے سے باہر بیان کی جاتی ہے۔
عینی شاہدین کے مطابق غزہ کی پٹی کے شمالی اور جنوبی علاقوں میں بھی زور دار دھماکوں کی آوازیں سنی گئی ہیں تاہم ان دھماکوں کی ہیئت اور ان کے نتیجے میں ہونے والے کسی بھی قسم کے نقصان کی تفصیلات سامنے نہیں آسکی ہیں۔
بشکریہ:مرکزاطلاعات فلسطین