اسرائیلی فوج کے ٹینکوں اور بلڈوزروں نے غزہ کی پٹی کے جنوبی علاقے پر دھاوا بول دیا۔ اس دوران بلڈوزروں نے سرحد کے اندر گھس کر درجنوں ایکڑ زرعی اراضی اور دیگر فلسطینی املاک کو بلڈوز کر دیا۔ دوسری جانب صہیونی بحریہ نے غزہ کے مغربی ساحل پر فلسطینی ماہی گیروں پر فائرنگ کر دی۔
فلسطینی ذرائع نے بتایا کہ اسرائیلی فوج کے ٹینکوں اور بلڈوزروں کی بڑی تعداد نے بدھ کے روز علی الصباح خان یونس کے شمال میں واقع اسرائیلی فوجی اڈے ’’کیسوفیم‘‘ سے غزہ پر حملہ کیا اور سرحد کے اندر گھس کر بڑے پیمانے پر فلسطینی شہریوں کی املاک کو روند ڈالا۔
ذرائع نے بتایا کہ ایک جانب اسرائیلی بلڈوزر فلسطینی املاک کو بلڈوز کر رہے تھے تو دوسری جانب سرحد پر قائم اسرائیلی سکیورٹی ٹاور سے فلسطینیوں پر فائرنگ شروع کر دی گئی جس کی زد میں آکر متعدد افراد زخمی ہو گئے ہیں۔
دوسری جانب 360 مربع کلومیٹر غزہ کی پٹی کے مغربی ساحل پر فلسطینیوں کو ہدف بنایا گیا، یہاں اسرائیلی بحریہ کے اہلکاروں نے مچھلیوں کا شکار کرنے والے فلسطینی ماہی گیروں پر فائر کھول دیا۔ تاہم خوش قسمتی سے کوئی فلسطینی فائرنگ کی زد میں نہیں آیا۔