غزہ (روز نامہ قدس ۔آن لائن خبر رساں ادارہ) صیہونی جیلوں میں قید بھوک ہڑتال فلسطینی اسیران اور جیل انتظامیہ کے درمیان معاہدہ طے پا گیا ہے جس کے بعد اسرائیلی جیل حکام نے اسیران کے مطالبات تسلیم کر لیے ہیں۔
روز نامہ قدس کو موصول ہونے والی اطلاعات کے مطابق قومی تحریک اسیران کی طرف سے جاری کردہ ایک بیان میں کہا گیا ہے کہ اسرائیلی جیلوں میں قید فلسطینی قیادت اور اسرائیلی انتظامیہ کے درمیان معاہدہ طے پا گیا ہے۔
فلسطینی اسیران تحریک کے رہنماؤں نے غزہ میں ایک پریس کانفرنس سے خطاب میں کہا کہ اسرائیلی جیلروں نے جیلوں میں کینسر کا سبب بننے والے جیمرز اور دیگر مواصلاتی آلات ہٹانے، اسیران کو اپنے اقارب سے ٹیلیفون پر بات چیت کی اجازت دینے اور تمام عقوبت خانوں میں قیدیوں کو فون کی سہولت کی فراہمی سے اتفاق کیا ہے۔
بیان میں کہا گیا ہے کہ اسرائیلی حکام نے اسیران کے خلاف 16 فروری 2018ء سے عائد کی گئی تمام پابندیاں ختم کرنے بالخصوص جیلوں میں جیمرز ہٹانے کا مطالبہ تسلیم کر لیا ہے۔
خیال رہے کہ گذشتہ ہفتے اسرائیلی جیلوں میں قید 400 فلسطینی اسیران نے بھوک ہڑتال شروع کی تھی۔ ایک ہفتے سے زائد عرصے تک جاری رہنے والی اس بھوک ہڑتال میں متعدد فلسطینیوں کی حالت تشویشناک ہوگئی تھی اور انہیں ہسپتال منتقل کرنا پڑا تھا۔