یورپی ملک ناروے کے وزیرخارجہ بورگ برنڈے نے فلسطین کے علاقے غزہ کی پٹی پر اسرائیل کی اکاون روز تک جاری رہنے والی وحشیانہ بمباری میں ہونے والی خوفناک تباہی پر گہرے دکھ کا اظہار کیا ہے۔
انہوں نے صہیونی ریاست سے مطالبہ کیا ہے کہ وہ غزہ کی پٹی پر عائد اقتصادی اور معاشی پابندیاں فوری طور پر ختم کردے۔
مرکز اطلاعات فلسطین کے مطابق غزہ کی پٹی کے دورے کے دوران مسٹر برنڈے نے شہر میں جنگ کے دوران ہونے والی تباہ کاریوں کا جائزہ لیا۔ انہوں نے یقین دلایا کہ ناروے کی حکومت غزہ کی تعمیرو ترقی اور بحالی کے میدان میں جہاں تک ممکن ہوگا مدد فراہم کرے گی۔ انہوں نے کہا کہ غزہ کی تعمیر نو اور بحالی کے کاموں کے لیے ضروری ہے کہ علاقے کا محاصرہ ختم ہو اور تعمیراتی سامان کو آزادانہ متاثرہ علاقوں تک پہنچایا جاسکے۔
قبل ازیں ناروے کے وزیرخارجہ نے غزہ کی پٹی میں وزیر برائے آباد کاری و محنت مفید الحساینہ کے ہمراہ مشرقی غزہ کی الشجاعیہ کالونی کا دورہ کیا جسے اسرائیلی فوج نے کارپٹ بمباری کے ذریعے ملبے کا ڈھیر بنا دیا ہے۔
دورے کے اختتام پر غزہ میں ایک نیوز کانفرنس سے خطاب کرتے ہوئے انہوں نے کہا کہ میں نے جو کچھ غزہ کی پٹی میں دیکھا اس جیسی تباہی اور بربادی اور کہیں نہیں دیکھی گئی۔ میرے خیال میں غزہ کی تعمیر نو کے کاموں کے لیے اربوں ڈالر کی رقم درکار ہوگی۔ انہوں نے کہا کہ غزہ کی پٹی می تعمیر نو تمام ممالک کی اخلاقی اور انسانی ذمہ داری ہے۔ ناروے بھی اس میں بڑھ چڑھ کر حصہ لے گا۔ انہوں نے کہا کہ آئندہ مہینے مصر میں غزہ کی تعمیر نو کے حوالے سے ہونے والی ڈونر کانفرنس میں ان کا ملک بھرپور طریقے سے شرکت کرے گا۔