مرکز اطلاعات فلسطین کے مطابق مصری وزارت دفاع کی جانب سے جاری ایک بیان میں کہا گیا ہے کہ غزہ کی سرحد سے متصل علاقوں میں سرحد سے آر پار آمد ورفت کے لیے بنائی گئی سرنگوں کے مسئلے سے نمٹنے کے لیے فوری اقدمات کیے جا رہے ہیں۔ بیان میں کہا گیا ہے کہ غزہ کی سرحد پردونوں طرف مکانوں کے اندر سے بھی سرنگیں کھودی گئی ہیں۔اس کے علاوہ سرحد پر دونوں طرف موجود کھیتوں سے بھی سرنگیں کھود کر دو طرفہ آمد ورفت کے راستے بنائے گئے ہیں۔
مصری وزارت دفاع کا کہنا ہے کہ غزہ کی پٹی میں رفح کے علاقے میں کھودی گئی سرنگیں مصر کی قومی سلامتی کے لیے نقصان دہ ثابت ہو رہی ہیں۔ اس مسئلے کے مستقل خاتمے کے لیے سرحد پر سیکیورٹی زون کے قیام کی حکمت عملی اپنائی جا رہی ہے۔ غزہ کی سرحد سے متصل علاقوں میں مقیم شہریوں کو وہاں سے ہٹانے کی حکمت عملی کا فیصلہ جزیرہ نما سینا میں العریش کے مقام پر گذشتہ جمعہ کو دہشت گردی کے ایک واقعے کے بعد کیا گیا ہے۔ اس واقعے میں نامعلوم مسلح افراد نے بم دھماکوں اور فائرنگ سے تیس سے زاید مصری فوجی ہلاک اور دو درجن کو زخمی کر دیا تھا۔
مصری فوج کا کہنا ہے کہ انہوں نے بارڈر فورسزکی سیکیورٹی پرمامور دیگر اداروں کے تعاون سے چار نئی سرنگوں کا پتا چلا کر انہیں تباہ کیا ہے۔ پچھلے دو سالوں میں اب تک مجموعی طور پر 1845 سرنگیں مسمار کی جا چکی ہیں۔
خیال رہے کہ مصر کا فلسطین کی سرحد سے متصل علاقہ جزیزہ سینا پچھلے کئی ماہ سے شورش کا شکار ہے۔ مصری فوج کا دعویٰ ہے کہ حکومت مخالف عسکریت پسند گروپ اس علاقے میں اپنے ٹھکانے بنائے ہوئے ہین اور وہ غزہ کی پٹی کی سرحد سے فلسطینی علاقے میں زیر زمین سرنگوں کی مدد سے آتے جاتے ہیں۔ فلسطین کی جانب سے مصر کے اس دعوے کی سختی سے تردید کی جاتی رہی ہے۔ غزہ کی حکومت کا کہنا ہے کہ سرحد پر سرنگیں بنائے جانے کی بنیادی وجہ سرحدی راستوں کی بندش ہے۔ غزہ کے محصور شہری بنیادی ضروریات کے حصول کے لیے ان سرنگوں کے راستے مصر سے اشیائے ضروریہ حاصل کرنے کی کوشش کرتے رہے ہیں ۔
بشکریہ:مرکزاطلاعات فلسطین