مختلف عرب اوراسلامی ممالک کی جانب سے غزہ کی پٹی کے محصورین کے لیے خواتین کا پہلا امدادی قافلہ آج جمعہ کو مصر کے دارالحکومت قاہرہ میں پہنچ رہا ہے۔ توقع ہے کہ یہ قافلہ آئئندہ ہفتےکوغزہ کی پٹی کے لیے روانہ ہو گا۔
مرکز اطلاعات فلسطین کے مطابق امدادی قافلے کے کوآرڈینیٹر ڈاکٹرعصام یوسف نے میڈیا کو بتایا کہ غزہ کی پٹی کے لیے اپنی نوعیت کا یہ پہلا منفرد قافلہ ہو گا جسے "غزہ کا محاصرہ ختم کرو” کا نام دیا گیا ہے۔ اس قافلے میں شمولیت کے لیے مختلف عرب ملکوں بالخصوص اردن، الجزائر، مراکش اور دیگرممالک سے قافلوں کی شکل میں قاہرہ پہنچیں گے جہاں سے امدادی سامان اور ادویات کی خریداری کے بعد اسے غزہ کی پٹی میں لایا جائے گا۔
ڈاکٹر عصام یوسف کا کہنا تھا کہ غزہ آنے والے اس قافلے میں 36 خواتین سماجی کارکنوں کا تعلق مصر سے ہو گا جبکہ ستر خواتین دوسرے ملکوں سے تعلق رکھتی ہیں۔
امدادی قافلے میں ادویہ،خواتین کے استعمال کی اشیاء، بچوں کے کھلونے کپڑے اور دیگر سامان شامل ہو گا۔
بشکریہ: مرکز اطلاعات فلسطین