(فلسطین نیوز۔مرکز اطلاعات) قابض اسرائیلی فوج نے فلسطین کے علاقے غزہ کی پٹی کی سرحد سے متصل علاقے میں تازہ جنگی مشقیں شروع کی ہیں۔ دوسری جانب جنگی مشقوں کے ساتھ ساتھ اسرائیلی فوج کی غزہ میں دراندازی کا سلسلہ بھی جاری ہے۔
رپورٹ کے مطابق جمعرات کے روز صہیونی فوجیوں کی بڑی تعداد گاڑیوں کے ہمراہ جنوبی غزہ سے کئی سو میٹر اندر داخل ہوئی اور فلسطینی شہریوں کے کھیتوں میں نام نہاد سرنگوں کی تلاش کے لیے کھدائی کی گئی۔ایک مقامی فیلڈ آبزر ور نے بتایا کہ جمعرات کو جنوبی غزہ کی سرحد سے اسرائیل کے 4 بلڈوزر، کھدائی کرنے والی مشینیں اور ’’میر کافاہ‘‘ نامی ٹینک اور فوجیوں کی نقل وحرکت کے لیے استعمال ہونے والے ’’نمر‘‘ ٹرانسپورٹ ٹرک کوئی ایک سو میٹر اندر داخل ہوئے اور فلسطینی شہریوں کی زرعی اراضی کی کھدائی شروع کردی۔
ادھر غزہ کی مشرقی، شمالی اور جنوبی سرحد پر صہیونی فوج نے بڑے پیمانے پر جنگی مشقیں شروع کی ہیں۔ رپورٹ کے مطابق غزہ کی سرحد پر جاری جنگی مشقیں فلسطینیوں کی دراندازی روکنے کے تناظرمیں کی جا رہی ہیں۔