غزہ پر صیہونی دہشتگردی کے چونکا دینے والے انکشافات

(روز نامہ قدس ۔آنلائن خبر رساں ادارہ) فلسطینی حکومت کے میڈیا آفس نے آج منگل کی صبح ایک نئی رپورٹ جاری کی ہے، جو 470 دن تک جاری رہنے والی اس جنگ میں غیر قانونی صیہونی ریاست اسرائیل کی قتل و غارت اور جارحانہ کارروائیوں کی دستاویز پیش کرتی ہے۔ یہ جنگ غزہ کی انسانی زندگی کے تمام شعبوں کو نشانہ بناتے ہوئے تباہی پھیلانے کی ایک خوفناک مثال ہے۔

جنگ بندی کا نفاذ

گزشتہ اتوار کو فلسطینی مزاحمتی گروہوں اور "اسرائیل” کے درمیان جنگ بندی نافذ ہوئی، جس سے 15 ماہ تک جاری رہنے والی اس نسل کشی کا اختتام ہوا، جس نے غزہ میں بڑے پیمانے پر تباہی اور بے مثال انسانی بحران کو جنم دیا۔

اقتصادی اور جانی نقصانات

حکومتی رپورٹ کے مطابق، غیر قانونی صیہونی ریاست اسرائیل کے وحشیانہ حملوں سے غزہ کو ابتدائی طور پر 38 ارب ڈالر سے زیادہ کا نقصان ہوا ہے، جبکہ تباہی کی شرح 88 فیصد رہی۔

اس جنگ کے دوران اسرائیلی فوج نے 100,000 ٹن دھماکہ خیز مواد گرایا، جو زیادہ تر شہری آبادی پر گرا۔ نتیجتاً، 46,960 فلسطینی شہید ہوئے، جن میں 17,861 بچے شامل ہیں، جن میں 214 نومولود اور 808 ایک سال سے کم عمر کے بچے بھی شامل ہیں۔ 12,316 خواتین اور 14,222 افراد لاپتہ ہیں۔ کل شہداء میں بچوں اور خواتین کا تناسب 70 فیصد ہے۔

زخمی اور معذور

تقریباً 110,725 افراد زخمی ہوئے، جن میں 15,000 کو طویل مدتی علاج کی ضرورت ہے، اور 4,500 افراد کے اعضا کاٹے گئے۔ زخمی بچوں میں 18 فیصد کو اعضا کاٹنے کی ضرورت پڑی، اور 12,700 زخمیوں کو بیرون ملک علاج کی ضرورت ہے۔

خاندانوں کی تباہی

اس جنگ کے دوران، غیر قانونی صیہونی ریاست نے 2,092 خاندانوں کو مکمل طور پر ختم کر دیا، جن کے 5,967 افراد شہید ہوئے۔ 4,889 خاندانوں کے صرف ایک فرد کو زندہ چھوڑا گیا، جس سے شہداء کی تعداد 8,980 سے تجاوز کر گئی۔ 38,495 بچے یا تو اپنے والدین سے محروم ہو گئے یا ان میں سے کسی ایک کو کھو بیٹھے، اور 13,901 خواتین اپنے شوہروں سے محروم ہو گئیں۔

نقل مکانی اور انسانی بحران

اس جنگ نے تقریباً 2.3 ملین میں سے 2 ملین سے زیادہ افراد کو اپنے گھروں سے بے گھر کر دیا۔ ان میں سے بیشتر کو خوراک، پانی، اور دوا کی قلت کا سامنا کرنا پڑا۔ 110,000 خیمے بوسیدہ ہو گئے، اور 2.1 ملین افراد بیماریوں میں مبتلا ہو گئے۔

صحت کا بحران

غیر قانونی صیہونی ریاست نے 34 اسپتالوں کو تباہ یا ناکارہ کر دیا، 80 صحت مراکز مکمل طور پر ختم کر دیے گئے، اور 136 ایمبولینس گاڑیاں تباہ کر دی گئیں۔

تعلیم، ثقافت، اور بنیادی ڈھانچہ

غزہ میں 137 تعلیمی ادارے مکمل طور پر تباہ ہو گئے، اور 357 جزوی نقصان کا شکار ہوئے۔ 823 مساجد اور 3 گرجا گھر بھی تباہ ہوئے۔ اس کے علاوہ، 161,600 مکانات مکمل طور پر، اور 82,000 رہنے کے قابل نہ رہے۔

اقوامِ متحدہ کی پیش گوئی

اقوام متحدہ کا کہنا ہے کہ اس تباہی کے ملبے کو صاف کرنے میں 21 سال لگیں گے اور اس پر 1.2 ارب ڈالر لاگت آئے گی۔ رہائشی یونٹوں کی بحالی میں تقریباً 80 سال لگ سکتے ہیں۔

یہ رپورٹ غزہ پر غیر قانونی صیہونی ریاست کے مظالم کی گواہی دیتے ہوئے عالمی برادری سے فوری مدد اور کارروائی کا مطالبہ کرتی ہے۔